Cirmautok Cordovillan (Nafarroa) duen auto denda eta konponketa lantegia ixteko asmoa duela jakinarazi du ELAk. Sindikatuaren arabera, enpresako zuzendaritzak negozioa desegiteko lan erregulazio espediente bat aurkeztu du, eta, ondorioz, 30 langileak kaleratuko ditu. ELAk greba mugagabea deitu du ostegunetik aurrera.
Sindikatuaren iturrien arabera, enpresak 8 milioi euroren diru sarrerak izan ditu azken urteetan, eta ez du ixteko arrazoirik. Are gehiago, salatu duenez, negoziazio epean «agerian» gelditu da enpresak ez zuela akordio bat lortzeko asmorik: «Ez du aztertu ere egin neurri ez hain traumatikoak hartzeko aukera, eta ez ditu arrazoiak justifikatu nahi izan».
ELAk deia egin dio Nafarroako Gobernuari, eta eskatu dio ez dadila aldendu, auzi honek lanpostuen galera ekarriko baitu, eta enpresak ez du halakorik egiteko arrazoi objektiborik, ezta negoziatzeko borondaterik ere.