Atzoko osoko bilkuran hartu zuen erabakia Ibarrako Udalak (Gipuzkoa): Uemaren estatutuak onartu eta mankomunitateko kide izateko eskaera egin zuen. EH Bilduren sei zinegotzien eta EAJren lau zinegotzien aldeko botoekin hartu zuten erabakia. PSE-EEko zinegotzia izan zen aurka agertu zen bakarra.
2016ko datuen arabera, herritar guztien %74,86 euskaldunak dira Ibarran. «Oro har euskaraz bizi dira herrian, baina udalerri euskaldun gehienetan bezala, hauskortasunaren inguruko kezka ere badu Ibarrako Udalak, edozein aldaketarekin egoera iraultzeko arriskua benetakoa delako», azaldu du Uemak. «Euskararen kale erabilerari dagokionez, esaterako, 2019ko datuen arabera %54,60ra egiten du behera ehunekoak, haurren (%79) eta gazteen (%66,92) artean datuak askoz hobeak diren arren. Uemako kide bihurtuta, Ibarrako Udalak euskararen biziberritzean hizkuntza politika sendo eta bateratuekin eragiteko asmoa du, elkarlanean, Tolosaldeko gainerako udalekin eta Uemarekin batera».
Uemak abenduaren 18an eginen du batzar nagusia, Idiazabalen (Gipuzkoa). Batzar horretan aztertuko dituzte Uemako kide izateko herri berrien eskaerak. Ibarra Ueman sartzea onartzen badute, Tolosaldeko 28 herrietatik 20 izanen dira mankomunitateko kideak.