Deus gutxi aurreratu dute, baina egin dute iragarpena: Cristobal Balentziaga moda diseinatzaile getariarrari buruzko telesaila ekoitziko du Disney Plus plataformak. Gaur goizean eman dute proiektuaren berri, konpainiaren Twitter kontuaren bidez, txio batean. «Albistea emateko irrikan ginen», idatzi dute, gaztelaniaz, eta eman dute albistea. «Bere estatus sozialari desafio egin zion gizona», Balentziaga, izanen da protagonista, jakinarazi dutenez.
Espainian ekoitziko dute ikus-entzunezkoa, eta, hala, argitu dutenez, hori izanen da Disney Plusek Espainian ekoitziko duen fikziozko lehenbiziko eduki originala. Dena dela, Balentziaga ez da telesailean rol inportantea duen euskal herritar bakarra: Jon Garaño, Aitor Arregi eta Jose Mari Goenaga dira zuzendariak. Hala eta guztiz ere, ekoizpena gaztelaniaz izanen da. Hain zuzen, hautatutako hizkuntza erdara izateak dagoeneko ekarri du erreakziorik. Kritika egin du, besteak beste, Disney Euskaraz plataformak:
Euskaldunek sortzen duten euskaldunei buruzko telesaila euskaraz ezin ikusi ahal izatea ez da onargarria. #DisneyEuskaraz#PantailakEuskaraz@PantailakEus
— Disney Euskaraz (@DEuskaraz) November 12, 2021
Loterian ere bai
Garañok, Arregik eta Goenagak osatutako hirukotea bi aldiz izan da albiste denbora tarte aski estuan. Hain zuzen, Loreak, Handia eta La trinchera infinita filmen zuzendariak izan dira aurten Espainiako Loteriaren iragarkia gidatzearen arduradunak. Euskal Herrian grabatu dute.
