Hilda aurkitu dute joan den ostegunean Lantzen (Nafarroa) desagertu zen 84 urteko emakumea, herrigunetik bi kilometrora, baso batean. Azken orduetan, bilaketa eremua zabaltzea erabaki dute arduradunek, eta horri esker aurkitu ahal izan dute gaur, 12:15ak aldera.
Emakumeak ez zuen osasun arazorik, eta bere ohiko ibilaldia egitera irten zen ostegun eguerdian. Normalean alabarekin paseatu ohi zuen, baina, hura herrian ez zegoenez, bakarrik joan zen. Geroxeago heldu zen alaba, eta, amaren berririk ez zuela eta, abisua eman zuen. Ordutik 120 lagun inguruko talde bat jardun da haren bila gau eta egun.
