Atzo arratsaldean, bostak aldera, auto batek jendetzaren kontra jo zuen Wisconsingo (Ameriketako Estatu Batuak) Waukesha hirian egiten ari zen eguberri desfile batean. Ibilgailuak hamarka pertsona harrapatu zituen: gutxienez bost hildako dira oraingoz, eta, horiez gainera, beste 40 lagun zauriturik daude. Horietako batzuk adingabeak dira. Dena dela, zauritu gehiago ere izan daitezkeela argitu du Poliziak, desfilean ziren hainbat lagun beren kabuz joan baitira ospitalera. Datozen orduetan jakinaraziko dute kopurua zehazki.
Poliziek gizonezko bat eraman dute atxilo, erasotzailea izan daitekeelakoan. Gertatutakoa zergatik gertatu zen ikertzeko ahaleginean, poliziek hainbat hipotesi dituzte mahai gainean. Edonola ere, eraso terrorista izan daitekeen ari dira aztertzen, batik bat. Halaber, azaldu dute inguruko hainbat lagunek ezohiko gertaerak bizi izan dituztela bart. «Herritar askok gertakari traumatikoak jasan dituzte», argitu du Poliziak. Horiek horrela, arreta psikologikoa emateko zerbitzua jarri dute martxan, telefono bidez.
