Albistea entzun
Emakumeen aurkako indarkeriari ez
Emakumeen aurkako indarkeriari ez
Emakumeen aurkako indarkeriari ez

Lan gatazkak

EAEko Auzitegi Nagusiak Novaltia zigortu du, greba eskubidea urratzeagatik

Isuna jarri dio greban dauden beharginak aldi baterako laneko enpresetako langileekin ordezkatzeagatik. Novaltia botika banaketan jarduten duen kooperatiba bat da, eta farmaziak dira haren bazkideak. Bi urte pasa darama greban Zamudioko biltegiko lantaldearen erdiak.

Novaltiako langileen protesta bat, Bilbon
Novaltiako langileen protesta bat, Bilbon Foku Tamaina handiagoan ikusi

Jokin Sagarzazu -

2021eko azaroak 23 12:01

EAEko Auzitegi Nagusiak Novaltia zigortu du greban dauden langileak aldi baterako laneko enpresetako (ABLE) langileekin ordezkatzeagatik, eta 6.251 euroko kalte ordaina eman beharko dio ELA sindikatuari, grebarako eskubidea urratzeagatik.

Farmazia produktuak banatzen dituen kooperatiba bat da Novaltia, eta Zamudioko biltegiko (Bizkaia) hogei langile —lantaldearen %40 inguru— greban daude 2019ko uztailaren 23tik, lan baldintzak hobetzeko. 2019ko azarotik, blokeatuta daude lan hitzarmen bat adosteko negoziazioak.

2020an, Novaltiako zuzendaritzak grebalariei jakinarazi zien oporrak txandaka hartu behar zituztela ekainetik abendura bitartean, eta, horiek ordezkatzeko, aldi baterako laneko enpresetako hemeretzi langile kontratatu zituen. ELAk auzitara jo zuen, greba eskubidea urratzen zuelako eta erabakia langile batzordearekin adostu gabe zegoelako.

Auzitegiak arrazoia eman dio ELAri. Honela dio ebazpenean: «Eztabaidagarria da enpresak greban zeudenen oporraldia ordezkatzea modu partzialean konfiguratuz; gainera, kontuan hartzen badugu langileek ez zituztela aldez aurretik oporrak onartu, opor horiek ematea eta ustez oporraldian zeuden langileak ordezkatzea grebarako eskubidea urratzea da».

Bi urte luze greban

Sindikatuak epaia txalotu du, eta Novaltiako zuzendaritzari eskatu dio «soldata eta lan baldintza duinak» jasotzen dituen hitzarmen bat «behingoz» negoziatzeko. Grebaren harira zuzendaritzak hartu dituen hainbat erabaki auzitegietan salatu ditu ELAk; kasu batzuetan arrazoia eman dio, eta beste batzuetan ez. Sindikatuak salatu duenez, Lan Ikuskaritzaren «konplizitateari esker» jokatu du modu horretan enpresak. Botika banaketan jarduten duen kooperatiba bat da Novaltia, eta farmaziak dira haren bazkideak.

2019. urtean, zuzendaritzak Bizkaiko biltegiko enpresa hitzarmena etetea erabaki zuen, eta Espainiako Estatuko hitzarmena aplikatzen hasi zen; hark lan baldintzak asko okertu zituen, beste hainbat sektoretan gertatzen den moduan. Greban dauden langileek eskatzen dute soldata eskala bikoitzik ez egotea: diotenez, kontratu berrietan %35 gutxiago pagatzen du Novaltiak, eta soldata apalenek ez dituzte gainditzen 950 euroak; alegia, lanbide arteko gutxieneko soldatatik oso gertu daude. Horrez gain, igande eta jaiegunetan ere lan egiten dute, besteak beste.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Ursula von der Leyen Europako Batzordeko presidentea, asteazken honetan eginiko agerraldian ©Olivier Hoslet (Efe)

Txinaren zetaren bideari aurre egiteko plana aurkeztu du Bruselak

Jokin Sagarzazu

Bruselak datozen sei urteetan 300.000 milioi jarri nahi ditu garraio eta energia azpiegiturak finantzatzeko Europatik kanpo.

Bilboko manifestazioa, gaur goizean. ©LAB

Milaka langile kalean, lan, pentsio eta bizi baldintza duinen alde

Xabier Martin

ELA, LAB, ESK, Steilas, Etxalde, Hiru, CGT eta CNT sindikatuek deituta, manifestazioak egin dituzte Hego
Euskal Herriko hiriburuetan. Arratsaldean, martxa gehiago egongo dira hainbat herri eta auzotan, lan eta pentsio erreformen aurka eta bizitza duinaren alde.

Gasolindegi bateko argazkia, artxiboan. ©Bob Edme

Frantziako Gobernuak orotara berrehun euroko laguntza emanen die herritar «xumeei»

Oihana Teyseyre Koskarat

2.000 euro baino lansari apalagoa duten herritarrek jasoko dute laguntza: ehun euro energiaren prezioen emendatzearentzat, eta beste ehun euro inflazio orokorrarentzat.

Miarritzeko Enplegu Zerbitzu Publikoa, artxiboko irudi batean. ©BOB EDME

Langabe saria lortzeko baldintzak zorroztu dituzte Iparraldean

Oihana Teyseyre Koskarat

Lan egin beharreko gutxieneko epea luzatu du Frantziako Gobernuak, eta saria apalagoa izanen da. Sindikatuek salatu dutenez, «prekarioenak prekarioago» eginen ditu

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.