Hilabeteak pasatu dira, baina, itxura guztien arabera, azkenean Villarejo auziko epailearen aurrean deklaratu beharko du Ignacio Sanchez Galan Iberdrola konpainiako presidenteak. Urtarrilaren 18an izango da, eta ikertu gisa deklaratuko du Galanek, hala izendatu zutelako ekainean, eroskeria, pertsonen intimitatearen kontrako delituak eta merkataritza agirien faltsutzea leporatuta.
Iberdrolako presidenteari egozten diote enkarguak egin izana Jose Villarejo polizia komisario ohiarekin lotura zuen Cenyt enpresari, hain zuzen politikariak, talde ekologistak, eta enpresa lehiakideak zelatatzeko helburuz.
Presidentearen aurretik Iberdrolako beste bi kargudunek deklaratuko dute urtarrilaren 17an: Francisco Martinez Corcoles konpainiako negozioetarako zuzendari nagusiak eta Rafael Orbegozo presidentearen kabinete buru ohiak, haiek biak ere ikertu gisa. Haiez gain, Galanek deklaratzen duen egun berean agertuko da epailearen aurrera Fernando Becker Espainiako Iberdrolako presidente ohia. Urtarrilaren 20an, berriz, Iberdrola Renovables Energia filialaren txanda izango da.
Sanchez Galan ez da izango Villarejo komisarioa kontratatzeagatik auzitegietan deklaratzen duen lehen enpresaburua. Ikertu gisa epailearen aurrean deklarazioa egin behar izan dute dagoeneko Repsolen presidente Antoni Brufauk, Caixabankeko presidente ohi Isidro Fainek eta Francisco Gonzalezek, BBVAko presidente ohiak.