Sute txiki bat izan da gaur goizean Zubietako erraustegian (Gipuzkoa). Gipuzkoako Hondakinen Kontsortzioak jakinarazi duenez, 10:00ak aldera piztu da sua tailerrean, bertan egiten ari ziren soldadura lanen ondorioz.
Suhiltzaileek dagoeneko itzali dute sua, eta Gipuzkoako Hondakinen Kontsortzioak adierazi du kalte larririk ez dela izan: «Berehala kontrolatu dute, eta kalte material gutxi izan dira».
GuraSOS elkarteak salatu duenez, azken hiru urteetan gutxienez bederatzi istripu izan dira erraustegian: suteak, errekarako isurketak, leherketak... Haien hitzetan, gaur izandako suteak «segurtasunaren porrot sistemikoa» berresten du.
