Adierazpena onartu du gaur Antsoaingo (Nafarroa) Udalak, atzo herrian gertaturiko eraso matxista bat gaitzesteko. Protesta elkarretaratzera deitu du erakundeak gaurko, 19:00etan, udaletxeko plazan.
«Emakumeen aurkako indarkeria giza eskubideen bortxaketa da, eta emakumeen oinarrizko eskubideen kontra egiten du», irakur daiteke udalak argitaraturiko oharrean. Horren arabera, eraso matxistak botere harremanetan oinarritzen dira, eta horien helburua «emakumeak betiko gizonen menpe bizitzea da».
Emakumea erietxean sartu behar izan zuten. Gizonezko bat atxilotu dute, eta gaur da pasatzekoa epailearen aurrean.
«Eraso fisiko eta sexual hau» arbuiatzen duela adierazi du udalak, eta elkartasuna adierazi dio erasoa pairatu duen emakumeari.
«Kalea, gaua, eguna pertsona orok gozatzekoak dira, eta emakumeek eskubidea dute horiek beldurrik gabe okupatzeko, eta segurtasunarekin eta aske bizitzeko».
Berdintasun politiken bitartez, udalak emakumeen aurkako indarkeria desagerrarazteko lanean jarraituko duela adierazi dute oharrean. «Herritarrei eskatzen diegu ez egoteko geldirik emakumeen aurkako indarkeriaren aurrean, eta zero tolerantziako jarrera edukitzeko».
