Albistea entzun

Martin Ugalde Foroa

«'Euskal Herria' kontzeptua galdu da ikasleen hizkeratik, eta hedabideetan ere lausotzen ari da»

Hedabideek Euskal Herria nola irudikatzen duten aztertu dute Martin Ugalde Foroan. BERRIAk zuzenean zabaldu du.

Edu Lartzanguren -

2022ko urtarrilak 27 09:11

Izan ala ez izen? Euskal Herriaren irudikapena euskal hedabideetan liburua ondu du Mondragon Unibertsitateko Huhezi fakultateko ikus-entzunezko komunikazioko irakasle eta ikertzaile talde batek, Martin Ugalde Bekari esker.

Eneko Bidegain Aire, Ainhoa Larrañaga Elorza eta Zuriñe Maguregi Sanchezen lanak hiru ardatz ditu: alde batetik, Euskal Herriaren irudikapenaren eta tratamenduaren argazkia egin dute. Horretarako, hedabideek sortzen eta erabiltzen dituzten mapak, terminoak, grafikoak eta datuak aztertu dituzte. Bestetik, hedabide bakoitzak osagai horiek zergatik aukeratzen dituen azaldu dute. Azkenik, herrialdea irudikatzeko osagaien batasun faltak sortzen dituen distortsioa eta arazoak nola konpondu proposatu dute.

Egindako lana azaldu dute gaur Larrañagak eta Maguregik Martin Ugalde Foroan, Andoaingo (Gipuzkoa) Martin Ugalde kultur parkean.

Ikasleen artean ikusi dute Euskal Herria kontzeptua desagertu egin dela haien hizkeratik, eta hedabideetan ere «lausotzen» ari dela. Larrañagak ohartarazi du arazoaren funtsa politikoa dela, eta eragile politiko gehienek erabaki dutela Espainiak eta Frantziak ezarritako banaketa administratiboak.

Maguregik azaldu du Euskal Herriaren lurraldetasunaren desitxuraketa atzeman dutela, eta horien arrazoiak aurkitu dituztela. Bederatzi arrazoi dira: EAEra mugatzen diren albiste gehienak erakundeetatik edo elkarteetatik datozela. Espainiako datuak jasotzen dira, eta horiek autonomia elkartez banaturik daude. Bateragarritasun faltaren arazoa azaldu du: nahasmendua dago erredakzio askotan Euskadi, EAE, Euskal Herria terminoak erabiltzean, irizpideak ez daudela bateratuta.

Kazetaritza azkarra da beste arrazoietako bat, eta kazetarien burujabetza falta. Euskal albiste agentziarik ez egoteak ere laguntzen du horretan. Maguregik adierazi du Eusko Jaurlaritzari bere ikuspegia azaltzeko eskatu diotela ikerketarako, baina erakundeak uko egin diola parte hartzeari.

Besteak beste, lurraldetasuna zaintzeko batzordea sortzea proposatu dute adituok.

Mahai ingurua

Ondoren, gaiaren inguruko mahai-ingurua egin dute Martxelo Otamendi BERRIAko zuzendariak (iragarrita zegoen Eider Goenaga ordezkatzen), Gure Irratiako Arantxa Idiederrek eta Tokikomeko Iban Arantzabalek. Eneko Bidegainek bideratu du solasaldia.

Gure Irratietan beste herrialdeetako informazioa nola lantzen duten azaldu du Idiederrek, Baztangoa (Nafarroa), esaterako.

Arantzabalek nabarmendu du hedabide handiek markatzen dutela agenda, eta euskarazko hedabideok «masibo» bihurtzeko erronkari heldu beharko lioketela.

Otamendiren arabera, hedabide guztiek bilatzen dute agenda propioa sortzea, eta hori dela zailena.

Arrosa sareak eta Tokikomen garrantzia nabarmendu du Idiederrek. «Hegozentrismotik ateratzeko aukera ematen dugu guk, baina Iparraldeko kuota bat izan gabe, han zer gertatzen den jakiteko. Ez gara kuota bat, baizik eta Euskal Herriaren parte».

Tokiko hedabideek «komunikazio talde bat osatzera» egin behar dutela adierazi du Arantzabalek.

Egunkari nazionalaren eta tokikoen arteko dikotomiaz harago joateko beharra nabarmendu du Martxelo Otamendik. Joseba Sarrionandiaren itzuleraren adibidea jarri du: Anboto tokiko hedabidearekin edukiko elkarlana nabarmendu du. Halere, hori gutxiegi egiten dela adierazi du. Kontrako norabidean ere gehiago egin beharko litzateke lan, BERRIAko zuzendariaren arabera. Orain, bakarrik «oso larriak diren gauzekin egiten dugu».

Datuen gaia jarri du mahaiaren gainean Eneko Bidegainek. Aipatu du BERRIAk genero indarkeriako kasuak jarraitzeko duen grafikoa, eta halako zer gehiago egin daitekeen galdetu du. «Nola da posible eraikuntza nazionalaz hitz egiten duen herri batean Gaindegia bezalako erakunde bat ixten uztea», adierazi du Otamendik, hura baitzen datu nazionalak ematen zituen bakarra.

Erreferente hura galdu izana deitoratu du Arantxa Idiederrek ere, lagun zuelako ezinbesteko informazioa lortzen.

«Datu gordinak falta ditugu hemen», adierazi du Iban Arantzabalek, demokraziak hori eskatzen duelako. Beste herrialde batzuetan halako datu gordinak kazetarien esku egoten direla nabarmendu du.

Sareko BERRIAzalea:

Udazkenean, BERRIAlagun egiteko pausoa eman dezazun, eskaintza bat egin nahi dizu BERRIAk. Herri baten kulturaren plaza da BERRIA. Kultur egitasmo, dinamika eta ekitaldi anitzen erakustoki. Euskal kulturaren inguruko informazioaren plaza handia. Azaroan eta abenduan, Euskaraldiak, Bertsolari Txapelketa Nagusiak eta Durangoko azokak hartuko dituzte, besteak beste, BERRIAren orrietako asko, paperean eta webgunean.

Albiste asko irakurriko dituzu, segur aski webgune honetan bertan. Eta eskari bat egin nahi dizugu: har ezazu konpromisoa irakurtzen duzunarekin. Irakurleen babes ekonomikoa funtsezkoa da BERRIAren etorkizuna ziurtatzeko.

Albiste gehiago

«Euskarak izan behar du hezkuntza sistemako hizkuntza normalizatua»

«Euskarak izan behar du hezkuntza sistemako hizkuntza normalizatua»

Imanol Magro Eizmendi - Arantxa Iraola

Euskalgintzako eta kulturgintzako pertsona ezagunak batu ditu Euskalgintzaren Kontseiluak eta aldarrikatu dute euskara eta euskal kultura ardatz izan behar dituela Araba, Bizkai eta Gipuzkoarako ontzen ari diren Hezkuntza Legeak

Eusk Jaurlaritzak, foru aldundiek eta Bilbo, Donostia eta Gasteizko Udalek Euskararen Eguna ospatu dute Gasteizen ©Irekia

Euskararen alde adostasunak josteko aldarria, aho batez

Edurne Begiristain

Euskararen Nazioarteko Eguna da gaur, eta hura ospatzeko ekitaldi eta adierazpen ugari egin dituzte instituzioek, alderdiek eta eragileek. Eusko Jaurlaritzak, foru aldundiek eta Bilbo, Donostia eta Gasteizko alkateek duela 40 urte Euskararen Legeak lortutako adostasuna goratu dute. EH Bilduk esan du euskararen alde «adostasun berriak» eraikitzeko unea dela.

Euskal Hedabideen emankizuna, goizean, Baionan. ©Kanaldude

Euskalgintzaren prekaritateari aurre egitea «zaila» izanen da energiaren kariotze garaian, Kurutxarriren ustez

Oihana Teyseyre Koskarat

Ipar Euskal Herriko Euskal Hedabideek emankizun berezia egin dute goizean, Baionan. Euskaraldiaren biharamunean, bilana egin dute, eta euskalgintzaren prekaritatea ere izan dute aipagai.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...