Bere burua defendatu du Benedikto XVI.a aita santu emerituak. Azken egunetan hainbatek egotzi diote sexu-abusu kasuen berri izan arren haiek estali izana, Municheko artzapezpikua zenean batez ere. Joseph Ratzingerrek, ordea, abusu horien berririk ez zuela esan du gaur argitaratu duen gutun batean, eta barkamena eskatu die bere agintaldian zehar abusuak jasan zituzten biktimei: «Lotsa sakona sentitzen dut».
Benedikto XVI.aren inguruko polemika berriz piztu da, Alemaniako abokatuen kabinete batek duela bizpahiru aste argitaratu zuen txosten batengatik. Dokumentu hark 173 apaizek egindako 497 abusu kasu biltzen ditu, eta Ratzingerri egozten dio lau kasutan neurriak hartu ez izana, Municheko artzapezpikua zenean (1977 eta 1982 artean).
Txosten hori argitaratu eta gero, aita santu emerituak aitortu zuen ez zuela egia esan ikertzaileei bidali zien 82 orriko dokumentuan. Zehazki, idatzi zuen ez zuela parte hartu 1980ko urtarrilean egindako bilera batean. Bilera hartan, abusuak egozten zizkioten apaiz baten lekualdatzeari buruz hitz egin zuten.
Txostenean, gezurra esatea egotzi zioten Ratzingerri; Municheko artzapezpikua zena han izan zela erakusten zuten frogak aurkitu zituzten. Orain, berriz, hutsegite bat izan zela esan du Benedikto XVI.ak, baina gehitu du berak ez zuela sexu-abusu kasu haien berri. Sexu abusuak estaltzea egotzi diote ikertzaileek.
Argitaratu duen gutunean, deitoratu egin du berari gezurti deitu izana. Esan du lan handia izan zela txosten hori osatzea, eta nahi gabe egindako huts bat izan zela bilera hartan ez zela egon jartzea: «Espero dut barkatuko didazuela». Besteak beste, Frantzisko egungo aita santuak erakutsi dion babesa eskertu du.
Barkamena
Gutunaren zati handi bat, ordea, biktimentzat da. Benedikto XVI.ak aitortu du sexu-abusu kasu bakoitza «konponezina» dela, eta barkamena eskatu die biktimei: «Ardura handiak izan ditut Eliza katolikoan. Min handia sentitzen dut nire agintaldian hainbat lekutan egin diren abusuengatik», gehitu du.
