«Ez politikan, ez kazetaritzan, ez justizian, dena ez da zilegi». Sare plataformak ohar bidez salatu duenez, Joseba Azkarraga bozeramailea «jazarpena» pairatzen ari da azken egunotan. Izan ere, Guardia Zibilak Espainiako Gobernuaren eta Sareren arteko kontaktuak ikertu ditu, eta hainbat hedabidek zabaldu dituzte ikerketa horren xehetasun batzuk. Zehazki, Espainiako Auzitegi Nazionalaren txostenaren kopia bat argitaratu dute, Azkarragaren datu pertsonalekin. Sarek salatu du dei eta mezuen bidez «mehatxuak eta irainak» jaso dituela bozeramaileak.
Sarek azaldu du ikerketaren bidez zenbait erakunderen arteko elkarrizketa bidea «kriminalizatzen» saiatu direla: «Nekez uler daitekeen hipokrisia ekintza da. Lehenago hitz egitea beharrezkoa bazen, gaur egun, ETA desagertu eta hamar urtera, euskal presoen egoerari irtenbide humanitarioak bilatzen dizkiona kriminalizatzea ulergaitza da». Halere, plataformak espero du gertatutakoa baliagarria izatea aurrerantzean Sarek edo beste erakunde batzuek herri administrazioekin, alderdiekin eta abarrekin duten harremana «behin betiko» normaltzeko.
Azkenik, Sarek argi utzi du bere lanarekin jarraituko duela; kalean mobilizatzen zein alderdi, sindikatu eta abarrekin hitz egiten eta haien aldarrikapenak helarazten. «Hori ez da aldatuko inongo hedabidek guztiz normalak eta beharrezkoak diren elkarrizketak edo bilerak filtratu izanagatik», gaineratu dute.
[Oharra] Aurreko astean hainbat hedabidek Sareren eta bereziki @josebaazkarraga ren jarduna kriminalizatu asmoz argitaratutako artikuluen aurrean gure irakurketa plazaratu dugu. Elkarbizitzaren alde, elkarrizketa eta akordioen bidea kriminalizatu nahi izana salatzen dugu. pic.twitter.com/zhdS6ephci
— Sare #IzanBidea â;Â;†Â—ï¸;Â; (@sare_herritarra) February 16, 2022
