Metalgintza sektoreko Arabako negoziazio kolektiboko azken bileretan ez da hurbilketarik izan sindikatuen eta SEA Arabako Enpresaburuen Elkartearen artean. Horregatik, ugazaben «immobilismoa» salatu dute langileek gaur Gasteizen, ELA, LAB, CCOO, USO, ESK eta CGT sindikatuek deitutako manifestazioan.
Arabako hitzarmenak 15.000 bat langileri eragiten die, eta azkena 2017. urtearekin iraungi zen. Hitzarmen berrirako sindikatuek KPIaren gaineko soldata igoerak eta lanorduen murrizketa eskatu dituzte, besteak beste. SEArekin, berriz, martxoaren 4an izango dute hurrengo bilera, eta, patronalak jarrera aldatu ezean, sindikatuak grebara jotzeko prest agertu dira.