Manuel Lezertua Arabako, Bizkaiko eta Gipuzkoako Arartekoak eta Arantxa Tapia Eusko Jaurlaritzako Ekonomiaren Garapeneko sailburuak inauguratu dute gaur, Bilbon, EAEko tokiko energia komunitateetan energia kontsumitzaile ahulen parte hartzea bermatzeko oztopo eta jardunbide egokiei buruzko jardunaldia. Lezertuak iturri berriztagarrietatik sortutako energia elektrikoaren «autokontsumoa sustatzeko» eskatu die instituzioei, pobrezia energetikoari aurre egiteko bitarteko gisa.
Era berean, Lezertuak hausnarketa bikoitza egin du. Batetik, esan du klima larrialdiak «trantsizio ekologiko eta energetikoa» eskatzen duela klima aldaketaren ondoriorik larrienak arintzeko. Bestetik, honako hau gehitu du: «Bidezko trantsizioa lortzeko betebehar etikoa dugu, kolektibo bakar bat ere atzean utziko ez duena, bereziki ahulenak. Eta herritarra politika energetiko eta klimatikoen erdigunean jarri behar dugu».
Alternatiba batzuk ere proposatu ditu Arartekoak. Bide horietako baten gisa proposatu du tokiko energia komunitateen bidezko autokontsumoa: tokiko bazkideen bitartez iturri berriztagarrietatik sortutako energiaren autokontsumoa modu kolektiboan sustatzeko eratutako erakunde bat, hain zuzen ere.
Testuinguru horretan, haren iritziz, instituzioek «kontuan hartu behar dute» elektrizitatearen faktura murrizteko eta familiekiko mendekotasun energetikoa murrizteko «potentziala» dutela.
