Urtarrilean grabatutako irudiak dira, Arlesko (Okzitania) presondegitik. Yvan Colonna preso korsikarra ageri da, beste preso batekin xake jokoan ari. Elkarrizketan ari dira bi gizonak, eta hauexek dira Colonnaren hitzak: «Korsika independentea izango da».
Sebastien Lecornu itsasoz haraindiko Frantziako ministroak errandakoaren erreakzio batekin hasten dute elkarrizketa. Colonna: «Ikusi duzu Lecornuk Guadaluperi buruz errandakoa? Autonomia aipatu daitekeela». Berehala, Korsikako egoerarekin parekatzen du, korsikarren %68 autonomiaren aldekoak direla erranda, eta, alta, Frantziak ez duela Korsikaren autonomiaz hitz egiten.
Beste presoak, ondotik, galdetzen dio urtero zenbat frantses doazen uhartera bizitzera. Colonnaren erantzuna: «Urtero, 4.000. Pixkanaka diluituak dira korsikarrak». Eta segitzen du: «Iratzarriko gara. Iratzarriko gara, ez kezkatu. Nik konfiantza dut». Korsika independentea izango ote den galdetzen dio gero presoak. «Noski, noski, independentea izango da». Bi gizonen irriekin bukatzen da bideoa.
"La Corse va être indépendante": l'échange entre Yvan Colonna et un codétenu filmé deux mois avant sa mort pic.twitter.com/m9EQR1o3Vi
— BFMTV (@BFMTV) March 31, 2022
Frantziako BFMTV hedabideak zabaldu du euskal preso batekin ari dela Colonna, baina BERRIAk ezin izan du informazio hori baieztatu. Izan ere, Etxerat elkartearen zerrendaren arabera, ez dago euskal «preso politikorik» kartzela horretan.
Arlesko presondegian grabatutako bideo bat da, han betetzen baitzuen kondena Colonnak; iragan martxoaren 2an jipoi bat eman zioten, eta koman egon ondotik martxoaren 21ean hil zen, ospitalean. Haserrea piztu du gertaerak uhartean, eta mobilizazio jendetsuak egin dituzte azken asteotan.
