Ferrero Iberica enpresak agindu du Kinder arrautzen zenbait eskaintza merkatutik erretiratzeko. Europa iparraldean salmonellosi kasu batzuk izan direlako albistea zabaldu ondotik, esku hartzea erabaki du konpainiak. Zehazki, Gabonetarako propio aterako sei unitateko arrautza sortari eraginen die aginduak, batik bat. Belgikan ekoitzia da, eta 2022ko apirilaren 20an iraungitzen zen.
Halaber, Kinder Schokobons, Kinder Sorpresa Maxi eta Kinder Happy Moments erretiratzeko ere agindu du enpresak. Maiatzaren 26an eta abuztuaren 21ean iraungitzen dira horiek. Ferrero Ibericak jakinarazi du gainerako produktuetan ez dela inolako arazorik, eta neurri horiek hartu dituela modu boluntarioan eta prebentzioz. Gainera, produktuok jadanik erosiak dituztenei gomendatu diete ez ditzatela jan.