Horrela eman du BERRIAk 22. Korrikaren azken egunaren berri

Jaioren mezua, osorik

Karmele Jaio idazleak irakurri du 22. Korrikako mezua. Irakurri osorik.

AEK-ko arduradunak ari dira oholtza gainean orain.

Amaitu du hitzartea Jaiok. Erreferentzia asko egin ditu, eta euskararen nortasunanean egin du azpimarra, baita hura indartzeko egiten diren ekintzetan ere.

Hastera doa Jaio.

Atzean Zuloako kideak ari dira amaiera ekitaldia aurkezten.

Karmele Jaio da mezuaren egilea

Berehala irakurriko dute mezua Boulevarrean.

Azken kilometroa!

Boulevarrean da lekukoa, azken kilometroan da Korrika. Jendetza, oihuka, euskararen aldeko aldarrikapenekin.

Nori emango diote lekukoa AEKko ordezkariek? Nork idatzi du lekukoak daraman mezua?

Udalbiltza, Uema, Hekimen, eta azken aurreko lekukoa, Kontseiluak. Jendetza izugarria dago Donostian.

Gehiengo sindikalaren ostean, alderdi politikoen txanda. Kilometro bateratua egin dute.

pic.twitter.com/Coe1FhTVmM

— AEK (@AEK_eus) April 10, 2022

Etxerat, Sare, Gure Esku, UEU, EHIGE, Euskaltzaindia, Ikastolen Elkartea... haien eskuetan dabil lekukoa azken kilometroetan.

Azken 10 kilometroetan sartu da Korrika!

Donostiako erdigunera bidean da Korrika! ETB2ko El Conquis saioko ordezkari gisa, Jose Luis Kortak hartu du lekukoa.

Aurreikusitako orduan

Dirudienez, aurreikusitako orduan iritsiko da Korrika Donostiako Boulevarrera: 12:30etarako. Ondoren izango da amaiera ekitaldia. Baina gogoratu: ez da hor amaituko festa.

Ilaski Serranok aurkeztuta, martxan da Korrikaren amaiera dela eta euskarazko hedabideek modu bateratuan antolatutako saioa. EITB, Kanaldude, 28 Kanala, Hamaika TB... eta, nola ez, BERRIA. Han dabil Nagore Arin kazetaria.

Ordubete eskas falta da 22. Korrikaren amaierako mezua nork irakurriko duen jakiteko. Txiolarien faboritoen artean, errepikatuenak, Itziar Ituño, Felix Zubia, Nerea Ibarzabal, Gorka Urbizu, Pirritx eta Porrotx... ea asmatzen duten.

Korrikak Donostia erdigunean egingo ditu azken kilometroak. Besteak beste, Gure Eskuk, Eusko Ikaskuntzak, alderdi politikoek, gehiengo sindikalak, Hekimenek eta Euskalgintzaren Kontseiluak eramango dute lekukoa azken metro horietan, Bulebarrera arte.

Lekukoa atzerapen apur batekin doa, baina kilometro gutxi falta zaizkio Boulevarrera iristeko. Jendetza dabil haren atzetik.

#Altza-ko aldapetan gora eta behera euskaraz! #KORRIKA #Hitzekin pic.twitter.com/xIWAfNGmF0

— AEK (@AEK_eus) April 10, 2022

Hasi da Korrikaren amaiera dela eta euskarazko hedabideek prestatutako saio bateratua. Jarraitu, zuzenean, BERRIAren webgunean.

Intxaurrondon dabil lekukoa. Ordubete baino zertxobait gehiago geratzen da 22. Korrika amaitzeko! Gogoratu, 11:30etatik aurrera, BERRIAn ikusgai izango duzuela euskarazko telebista kateek prestatu duten saio bateratua.

Egia, lepo

Egiako irudiak, bertatik bertara, Julen Aperribai BERRIAko lankidearen eskutik.

Azkenetan da #Korrika. 12:30ean helduko da Donostiako Bulebarrera. Egian oraintxe, aldapan gora @berria @AEK_eus #Hitzekin pic.twitter.com/NNBSStxgqo

— Julen Aperribai (@julenaperribai) April 10, 2022

Horrela esnatu da gaur Donostia, Olatz Artola BERRIAko berriemaile bereziaren eskutik.

Horrela esnatu da gaur Donostia. Iritsi da #korrika 11 egun hauetako azken geltokira, Amurriotik Donostiara. #BERRIAkorrika @berria#HitzEkin @AEK_eus pic.twitter.com/Vw8zNbbWRT

— Oli A.A (@olatzartola) April 10, 2022

Egian ikus daitezkeen irudiak, eta atzo Arrateko igoeran ikusi zirenak, antzekoak. Tropela handiagoa da gaur, ordea. Jendetzaren artetik doaz aurrera Korrikako furgoneta eta korrikalariak. Ederra dago igande goiza!

Bitartean, lekukoa ari da bere bidea egiten: Martutenetik Loiolara, eta Loiolatik Egiara, eragile baten eta bestearen eskuetatik pasaz.

Trenak, lepo

Renfek eta Euskotrenek zerbitzu bereziak jarri dituzte gaurko, eta asmatu dutela dirudi. Kike Amonarriz euskaltzaleak eman du abisua Twitterren: «Trenak lepo beteta Donostialdera #Korrika-ren amaierara! Gaurkoa sekulakoa, itzela, animalekoa, demasa izango den itxura guztia du honek».

Zuek zer plan duzue gaurko? Korrikak baditu proposamenak denentzat. Zortzi gune zabalduko dituzte: Bulebarrean, Alderdi Ederren, kaian, Zuloaga plazan, Plaza Berrian, Trinitate plazan, Gipuzkoa plazan eta Sarriegi plazan.

Herri bazkaria ere egongo da, Trinitate plazan. Iluntzean, kontzertuak izango dira zenbait gunetan. Besteak beste, Lamiak, En Tol Sarmiento eta Olatz Salvador musikariak ariko dira zuzenean. Lehentxeago, 16:30ean, bertso saioa izango da kaian, Beñat Gaztelumendi, Oihane Perea, Onintza Enbeita, Sustrai Colina eta Julio Soto bertsolariekin.

Atzerapen apur batekin dabil Korrika, orduerdi ingurukoa edo. Loiolan dago orain; handik Martutenera doa, gero Egiara, Intxaurrondora, Herrerara, Altzara, Bidebietara, eta, azken kilometroen ostean, Boulevarrera.

Anoeta barruan ere ibili da Korrika. Lekukoa, Txurdinen eskuetan.

Hauxe #Anoeta barruko unea! #Hitzekin pic.twitter.com/rP6crBhJz3

— AEK (@AEK_eus) April 10, 2022

Olatz Artola BERRIAren berriemaile bereziak bidali du azken bideo kronika. Badakizue horrek zer esan nahi duen: kilometro gutxi falta direla Korrika amaitzeko!

Amara Berrin, Anoeta estadioaren parean, Reala protagonista: Bultzada Txuri-Urdinak eraman du lekukoa lehenik, eta, Realaren ordezkari gisa, ondoren, Txurdin maskotak. Gizonezkoen lehen taldeko jokalariek, behintzat, ezinezkoa zuten bertaratzea, gaur Elxen jokatuko baitute (18:30).

Amurriotik Donostiara, denetik pasa du Korrikak: hotza, beroa, euria, elurra... egunotan zehar argazki bilduma bat osatu du BERRIAk, irudi onenekin. Azken eguna une egokia izan daiteke haiek berriz ikusteko ezta?

#Donostia-ko Alde Zaharrean sartu da #KORRIKA! pic.twitter.com/pX8zJhmp79

— AEK (@AEK_eus) April 10, 2022

Donostian, oraindik, egin behar ditu kilometro batzuk Korrikak. Amara, Loiola, Martutene, Egia, Intxaurrondo, Herrera... Boulevardera arte. Ondo bidean, 12:30etan helduko da hara lekukoa.

Lekukoa Grosen dabil orain, Zurriolako hondartza parean zehazki. Dozenaka eragileren eskuetatik igarotzen ari da lekukoa: Etxepare Euskal Institutua, Groseko Indarra surf taldea, Donostiako EH Bildu...

Ea, informazio praktiko pixka bat: Donostiara joateko asmoa baduzue, Euskotrenek eta Renfek zerbitzu bereziak ezarri dituzte. Sarriago ibiliko dira Renfeko trenak, eta ordu erdiko maiztasunez, Zumaia eta Donostia artekoak. Horrez gain, AEK-ko hainbat euskaltegik autobusak antolatu dituzte Donostiara joateko.

Nork irakurriko ote du 22. Korrikako azken mezua? Twitterren animatu dira batzuk porra egitera: Itziar Ituño, Felix Zubia, Nerea Ibarzabal, Gorka Urbizu... zer diozue zuek?

Donostian, jendetza

22. Korrikak jende andana bildu du pasa den leku bakoitzean, eta Donostia ez da gutxiago izango. Korrikalariek, gainera, lagun dute eguraldia. Lekukoa auzoz auzo dabil orain (Grosen sartu berri da), baina erdigunean egingo ditu azken kilometroak. Besteak beste, Gure Eskuk, Eusko Ikaskuntzak, alderdi politikoek, gehiengo sindikalak, Hekimenek eta Euskalgintzaren Kontseiluak eramango dute lekukoa azken metro horietan, Bulebarrera arte.

Atzo, berriz, Nafarroako ipar-ekialdetik Lapurdira igaro zen Korrika, muga administratiboak lausotuz, eta aurreko egunetako joera bera izan zuen berriro: indarra erakutsi zuen han eta hemen. Julen Aperribai BERRIAko lankideak idatzi du eguneko kronika.

Aurrez, gauerdian Bidasoko muga zeharkatu eta gero, Korrikak Irungo, Hondarribiko eta Oiartzualdeko herriak pasatu ditu, eta Astigarragatik eta Hernanitik igaro da goizaldean.

Gipuzkoan dabil #KORRIKA edizio honetako azken kilometroak egiten: Irunen (bi aldiz), Hondarribian… pic.twitter.com/13PxD90H6f

— AEK (@AEK_eus) April 10, 2022

Egun osoko egitaraua

Festa, ordea, ez da amaiera ekitaldiarekin amaituko: jai egitarau zabala antolatu dute egun osorako hirian. Zortzi gune zabalduko dituzte: Bulebarrean, Alderdi Ederren, kaian, Zuloaga plazan, Plaza Berrian, Trinitate plazan, Gipuzkoa plazan eta Sarriegi plazan.

Herri bazkaria ere egongo da, Trinitate plazan. Iluntzean, kontzertuak izango dira zenbait gunetan. Besteak beste, Lamiak, En Tol Sarmiento eta Olatz Salvador musikariak ariko dira zuzenean. Lehentxeago, 16:30ean, bertso saioa izango da kaian, Beñat Gaztelumendi, Oihane Perea, Onintza Enbeita, Sustrai Colina eta Julio Soto bertsolariekin.

Korrika, azken kilometroetan

Egun on guztioi! Iritsi da igandea, eta, harekin batera, 22. Korrikaren azken eguna. Jai giroa izango da nagusi gaur Donostian: lekukoa 7:30ak aldera iritsi da hara, eta amaiera ekitaldia egingo dute 12:30etatik aurrera. Amaierakoa mezua ere han irakurriko dute: nork irakurriko du? Zer esango du?