Historia urrezko letrekin idazten jarraitzen dute Txuri-Urdin izotz-hockey taldeko neskek. Duela aste gutxi albiste izan ziren lehen aldiz Espainiako Liga irabazi zutelako, eta gaur, berriz, Erreginaren Kopa altxatu dute; hura ere lehen aldiz. Finalean azken lau edizioetako garailea menderatu dute, Madrilgo Majadahonda taldea (3-6), Jakan (Aragoi).
Finala ez da samurra izan, donostiarrek markagailua irauli behar izan baitute. 20. minuturako, 2-0 galtzen ari ziren, eta madrildarren atezaina, gainera, bikain ari zen. Azkenean, ordea, lortu dute haren atea zulatzea. Golegileak hauek izan dira: Haizea Fernandez, Leticia Abrisketa (2), Cecilia Lopez (2) eta Maria Serna.
