Gaurtik aurrera, Hego Euskal Herriko barrualdeko leku gehienetan ez da derrigorrezkoa izango maskara erabiltzea, ezta EHU Euskal Herriko Unibertsitatean ere. Unibertsitateak arau berria errespetatuko du, baina gomendatu du maskara «arduraz» erabiltzeko unibertsitateko barnealdeko espazioetan, 2021-2022ko ikasturtea amaitu arte bederen. Hori horrela, unibertsitateko erabiltzaileek partekatzen dituzten barnealdeko espazioetan maskara erabiltzeko gomendioa egin dute, betiere, distantzia eta «aireztapen egokia» bermatu ezin badira.
Maskara derrigortuko ez badute ere, bestelako segurtasun neurriei eutsi asmo die EHUk. Hala adierazi du ohar bidez: «Euskal unibertsitate publikoak lokalen eta barruko gelen aireztapenerako indarrean dauden protokoloei eusten die, baita higieneari dagozkion neurriei ere».
Gaur-gaurkoz, EHUk ez du zehaztu langileek maskara jantzi beharko duten ala ez. Osasun agintarien esanen eta argitaratuko dituzten arauen zain daude. Behin horiek aztertuta, ez dute baztertu kasu batzuetan maskararen erabilera derrigortzea: «Unibertsitateak lanpostu, funtzio edo egoera pertsonal jakin batzuetan maskara erabiltzea erabaki ahal izango du, kasu bakoitzean aplikatzekoa den laneko arriskuen prebentzioari buruzko araudian ezarritako irizpideei jarraituz».
