Sophie Istillartek (Baiona, 1996) ez du futbolean jokatzen jarraituko. Gaur egun Athleticen lehen taldean jokatzen duen Ipar Euskal Herriko futbolari bakarrak 26 urte eskas ditu, baina, urtarrilaren 16an belaunean izandako lesio larri bat tarteko, futbola uztea erabaki du. Levanteren aurka izan zen, Bunyolen (Valentzia, Herrialde Katalanak). Istillarti martxoaren 2an egin zioten ebakuntza, eta, Athleticen arabera, osatze prozesua arazorik gabe doa aurrera. Jokalariak bihar emango du prentsaurrekoa Lezaman, 13:00etan, erabakia hartzera behartu duten arrazoiak azaltzeko.
Izan ere, iaz BERRIAk egin zion elkarrizketan, Istillartek Athleticen «urte asko» egiteko nahia erakutsi zuen: «Hala nahiko nuke. Jokalariok ditugun baldintzengatik, klubean dagoen familia giroarengatik eta, gustura banago, ez dudalako atsegin aldatzen ibiltzea. Zortzi urtez jokatu nuen Bordelen, adibidez», azaldu zuen ordukoan. Kapitain ere izan zen zen hango taldean.
Baionako jokalaria zortzi urterekin hasi zen futbolean jokatzen, Hendaian (Lapurdi); Irunen (Gipuzkoa) ere jokatu ostean, Bordelera joan behar izan zuen bere ibilbidearekin segitzera, Frantziako Lehen Mailara. Erdilaria 2020. urteko udan fitxatu zuen Athleticek. Klubak eskerrak eman dizkio Istillarti «bere inplikazioagatik eta konpromisoagatik, eta zorterik onena opa dio bere hurrengo proiektuetan».