Gorpu bat atzeman dute goizean Ega ibaian, Villatuerta eta Lizarra artean (Nafarroan). Gizonezko baten hilotza da, eta uretan erdi murgildua zela aurkitu dute, arbola baten adar batean trabaturik. Gorputza deskonposatze fase aurreratuan da, eta ikerketa abiatu dute, identifikatzeko. Poliziak susmoa du joan den abenduan desagerturiko gizona dela.
Izan ere, 42 urteko gizonezko bat abenduaren 4ko gauean desagertu zen Lizarran, Ega ibaiaren inguruan. Desagerpena salatu zenez geroztik, larrialdi zerbitzuak bilaketa lanetan izan dira hainbat hilabetez, baina orain arte ez dute erdietsi hura aurkitzea; gaur arte. Iruñera eraman dute gorpua, aztertzeko.