Ertzaintzak 24 eta 28 urteko bi gazte atxilotu ditu Ordizian (Gipuzkoa), labana batekin gizon bat hiltzen saiatzea leporatuta. Segurtasun Sailak jakinarazi duenez, igande arratsaldean izan zen erasoa, eta jarraian atxilotu zituzten gazteak, handik gertu. Gaur, epailearengana eramango dituzte deklaratzera.
Segurtasun Sailaren arabera, erasoa jasan zuen gizonak saihets aldean eta lepoaren atzealdean zituen zauriak. Hasieran, ertzain batzuek artatu behar izan zuten; gizonaren odol jarioari eutsi zioten, larrialdi zerbitzuetako langileak iritsi bitartean. Zumarragako ospitalera eraman zuten, eta arriskuz kanpo dago.
Atxilotu dituzten gazteek aurrekariak dituzte narkotrafikoagatik.
