Auto berrien matrikulazioak burua altxatu ezinda jarraitzen du Hego Euskal Herrian. Apirilean 2.141 auto berri saldu ziren, iazko hilabete berean baino %18 gutxiago. Lurraldeka aletzen hasita, deigarria da Nafarroan izandako jaitsiera, iazko apirilarekin alderatuta %28 egin baitzuen behera salmentak. Anfac eta Faconauto patronalen arabera, bi dira datu «txarren» arrazoiak: osagaien krisia eta haren ondorioz gustuko autoa aurkitzeko arazoak, eta ekonomiaren ziurgabetasuna. Energiaren krisiak eroslea uzkurtu egiten du.
Datu txarra, dena den, ez da hilabete bakarreko kontua, lehen lauhilekoaren joera baizik. Aurtengo urtarriletik apirilera 8.386 auto berri matrikulatu dituzte hegoaldean; iaz, berriz, 10.029 izan ziren. Horiek hala, urte arteko alderaketa eginez gero, urte hasierako jaitsiera %16,4koa da. Patronalak, dena den, badu itxaropenerako helduleku bat, apirila aurtengo martxoa baino hobea izan baita, bai behintzat batezbestekoei dagokienez. Martxoan, iazkoarekin alderatuta, %25,5 egin zuten behera salmentek. Hobekuntza hori, dena den, ezin da susperralditzat jo, patronalaren ustez.