Pirinioetako klima inpaktuaren bilakaera aztertu du OPCC Klima Aldaketaren Pirinioetako Behatokiak, Adapyr proiektuarekin. Duela bi urte eta erdi abiatu zuten ikerketa, eta, ondorioztatu dutenez, 1959tik 2020ra bitartean Pirinioetako batez besteko tenperatura 1,6 gradu igo da; horrela, 2020. urtea azken 62 urteetako beroena izan dela ohartarazi dute. Era berean, adierazi dute urteko batez besteko prezipitazioa %8 jaitsi dela eta Pirinioetako glaziarren erdiak desagertu direla.
Adapyr proiektuak Okzitania, Akitania Berria, Hego Euskal Herria, Aragoi, Katalunia eta Andorra barne hartzen ditu, «mugak gainditu eta ondare hori zaintzeko» elkarlanean aritzeko asmoz. Proiektuaren helburua da klima aldaketaren eraginak eta ondorioak behatzea, baita horietara egokitzeko «estrategia piriniotarra» definitzea ere.
2020ko otsailean hasi zuten proiektua; PLE Pirinioetako Lan Elkarteak bultzatuta, eta Interreg V-A Programako Europako funtsek finantzatuta. Proiektuarekin EPiCC klima aldaketari buruzko Pirinioetako lehen estrategia ondu dute, klima ekintzan lankidetzan aritzeko estrategia bat, hain zuzen. Estrategia hori bost esparrutan oinarritzen da: kliman, mendiko ekonomian, ekosistemetan, biztanlerian eta lurraldean, eta gobernantzan.
Mikel Anton Eusko Jaurlaritzako Europako Gaietarako zuzendari eta PLEko idazkari nagusiaren arabera, proiektua «handikap bat» izan da, eta Eva Garcia-Balaguer OPCC behatokiko koordinatzaileak elkarlanaren garrantzia nabarmendu du. Horrela, adierazi du 11 urte daramatzatela lankidetzan, eta «seiehun erakunde baino gehiago» aritu direla elkarlanean. Horren harira, Amaia Barredo Eusko Jaurlaritzako Ingurumen Jasangarritasuneko sailburuordeak azaldu du bakarrik «ezer gutxi» egin daitekeela, eta «benetako maila anitzeko gobernantza klimatikoaren» alde behar dela. Gazteen garrantzia ere nabarmendu du Barredok, eta gaineratu gazteek eta eskualdeek «eragile nagusi» gisa jokatzen dutela klima aldaketaren eraginak geldiarazteko orduan.