Gizarte mugimenduek ez dute jaigunerik edukiko datozen Sanferminetan. Herri Sanferminak koordinakundeak eta udala negoziatzen aritu dira azken asteotan, baina, azkenean, ez da akordiorik egon.
Udal gobernuko Navarra Suma alderdiak txosnak Alde Zaharretik atera nahi izan ditu, kosta ahala kosta. Herri Sanferminak koordinakundeak, berriz, biztanleei traba egingo ez dien eredu bat proposatu die: Oaren plazan, eta 01:00ak arte.
Hasieran, begi onez hartu zuten udalean proposamena, baina, azkenean, herri mugimenduei Alde Zaharra galarazi nahi zietenen irizpidea gailendu da.
Ikusi gehiago: Herri Sanferminak: «Ez da izanen txosnarik, baina ez gara desagertuko»
Udalak txosnak Runako parkean jartzea nahi zuen. Baina Herri Sanferminak koordinakundeko ordezkariek gogorarazi diote esperientzia txarra dutela leku horretan, jaiaren bihotzetik urrun dagoelako, eta jendea ez delako hara joaten. Izan ere, bi urtez egin zuen ahalegina han Gora Iruñea taldeak, eta dirua galdu zuen.
Herri Sanferminak koordinakundeak bihar azalduko du, zehaztasun handiagoz, zer gertatu den negoziazioetan.