Herritar batek eraso homofobo bat egin zion beste bati iragan asteko ostiralean Sopelan (Bizkaia), maiatzaren 27an, alegia. EH Bilduk eman du erasoaren berri. Koalizio abertzaleak zehaztu duenez, biktimak irainak eta mehatxuak jasan zituen. Bera joan zen udaltzainengana gertatutakoa kontatzeko, eta gorroto delitua salatu zuen.
Erasoa gaitzetsi eta LGTBI kolektiboari babesa azaltzea xede, Sopelako neska gazteen talde Ukatuk mobilizaziora deitu du etzirako. Elkarretaratzea eginen dute udaletxe parean, 20:30ean. Autodefentsa transmaribibolloa izanen dute lelo.
