Freeport LNG AEBetako gas natural likidotua (GNL) esportatzeko instalazio handienetako bat gutxienez hiru astez itxiko dute, Texasko golkoan duen biltegian asteazkenean izandako leherketa baten ondorioz. Reuters berri agentziaren arabera, leherketa zerk eragin duen ikertzen ari dira, baina konpainiak ez du beste xehetasunik eman nahi izan.
Gertakariak AEBetako gas naturalaren merkatuak astindu ditu, eta litekeena da eragina Europako eta Asiako merkatuetara ere zabaltzea, analistek ohartarazi dutenez. Freeport LNGk AEBetako gas natural likidotuaren %20 inguru esportatzen du. Geldialdiak tentsioa areagotu dezake Europako erosleengan, Ukrainako inbasioaren ondoren Errusiako GNLa erostea saihesten ari direlako, eta Txinako eskaria handitu egin delako.
«Ekoizpen etenaldi handi bat da, Estatu Batuetako instalazio handi batean. Eta horrek zera esan nahi du: eskasia. Merkatuetan gas likidotua lortzeko lehiaren ondorioz, litekeena da nabarmen igotzea prezioak», azpimarratu du Rapidan Energy ikerketa zentroko zuzendari Alex Muntonek.
Hego Euskal Herrira iristen den gas gehiena (%62,75) itsasontziz iristen da, Bilboko portura, gas likidotu moduan (GNL) eta bereziki AEBetatik, alde handiz.
Iaz, AEBetako gas likidotuaren esportazioak hazkunde izugarria izan zuten, eta bide beretik jarraitzea aurreikusten dute, Errusiari jarritako betoengatik. Freeport LNG 2002an sortu zuten, eta Europako eta Asiako gas hornitzaile nagusiekin egiten du lan; besteak beste, BP, Total Energies, JERA, Kansai Electric eta Osaka Gas. Gaur egun, Texasko planta handitzeko obretan ari zen.
