Joan den maiatzaren 18an, Iñigo Urkullu Eusko Jaurlaritzako lehendakariak iragarri zuen urtean 100.000 euro baino gutxiagoko errenta daukaten gurasoei seme edo alaba bakoitzeko 200 euroko diru laguntza emango diela Jaurlaritzak hilero, umeak 3 urte bete arte. Gaur, EH Bilduk eta Elkarrekin Podemos-IUk Eusko Legebiltzarrean eskatu dute laguntza hori gutxienez seme-alabek 18 urte bete arte «era progresiboan» luzatzeko. Haatik, ekinaldiak ez du aurrera egin. EH Bilduk eta EP-IUk laguntzen sistema «unibertsala» proposatu dute, besteak beste, zerga kenkariek gaur egun duten izaera «erregresiboa» gainditzeko eta errenta apalak dituzten familiek zerga onurak eskuratzeko dituzten oztopoak ezabatzeko.
EH Bilduren iritziz, Save the Children gobernuz kanpoko erakundeak herenegun aurkeztu zuen txostenak –Zenbat kostatzen den haurrak haztea Euskadin 2022– argi eta garbi erakusten du premiazkoa dela egun indarrean dagoen familientzako diru laguntzen sistema publikoa indartzea eta hobetzea. Nerea Kortajarenak gogoratu duenez, aipatutako txostenaren arabera, seme-alaben mantenua %19 igo da lau urtean, eta Arabako, Bizkaiko eta Gipuzkoako 29.000 familiak ezin dute ordaindu. «Areago, mantenua gero eta garestiagoa da seme-alabek 3 urte bete ostean. Hau da, gastuak are handiagoak direnean, 3-18 adin tartean, Jaurlaritzak ez du inolako laguntza berririk planifikatu familientzat».
Elkarrekin Podemos-IUko Isabel Gonzalezek adierazi du ezinbestekoa dela laguntzak indartzea, eta Jaurlaritzari eskatu dio «benetako borondate politikoa» erakusteko haurren pobrezia serio hartzeko. Elkarrekin Podemos-IUk proposatu du zerga sistema berrikustea, haren ondorio «erregresiboak iraultzea», seme-alaba bakoitzeko prestazioak 18 urtera arte luzatzea, eta egoerarik ahulenean dauden familientzako prestazioak sustatzea.
Elkarteen babesa
EH Bilduren eta Elkarrekin Podemos-IUren eskaera horrekin bat egin dute Save the Childrenek eta Unicef elkarteek, ohar batean. Esan dute beharrezkoa dela laguntzak «unibertsalak» izatea, eta «egiturazko neurriak» eskatu dituzte haur guztien eskubideen alde. «Gure ustez, ezinbestekoa da hazkuntza unibertsalerako laguntza proposatzea, zerga kenkari itzulgarrien bidez, 18 urtera arte». Elkarteek uste dute diru sarrera oso txikiak dituzten eta errenta aitorpena egitera behartuta ez dauden pertsonak ezin direla sistematik kanpo utzi.
