Gipuzkoako Arastortz mendian, Aralako parke naturalean, larunbatean piztu zen suteak pizturik jarraitzen zuen atzo arratsaldean, Gipuzkoako Aldundiak jakinarazi duenez, baina 19:00etan kontrolpean zutela jakinarazi zuen. Hala ere, egoera ezegonkorra izanik, erne jarraituko zutela gaineratu zuen. Ataun, Lazkao eta Zaldibia artean piztu zen, eta 25 hektarea erre zituen, parke naturalean eta inguruetan.
Hasieran uste bazuten ere larunbat gauean kontrolpean hartu zutela, atzo goizean ikusi zuten zenbait lekutan sua dagoela oraindik. Aldundiak esan zuen ez direla batere leku errazak iristeko, baina urarekin iristen lortzen ari direla. Basozainak eta Gipuzkoako suhiltzaileak aritu dira lanean.
— Zaldibiako Udala (@zaldibiaeus) June 19, 2022
«Erretako eremuari dagokionez, lehen ikuskapenen arabera, inguru horretako harkaiztiak, otadiak, eta landaketa eta hostozabalen zenbait baso –batez ere azpiko landaretza– hondatu ditu suak, Aralarko parke naturalean eta mugetan. Esan bezala, 25 hektareatik gora», adierazi du Gipuzkoako Aldundiak.
Aralar Bizirik elkarteak salatu du hegaztientzako babes handiko eremu bat erre duela suak, eta jakinarazi du adituen arabera nahita piztu zela sua. «Eta guk galdetzen dugu, natur parkean izan bada, atzotik genioena eta komunikabide gehienek ukatu dutena, non dago Foru Aldundiko Natur Parkeetako arduraduna, ezer esan gabe, bere ardura natur parkeen kudeaketa bada?». Sua itzaltzeko lanetan suhiltzaile bat zauritu da.
