Lehen greba eguna izan dute Bizkaiko eraikinetako eta lokaletako garbitzaileek. Sektoreko 11.000 langileri eragiten die lan hitzarmeneko genero arrakalak, eta, hori salatzeko, ehunka garbitzaile atera dira Bilboko kaleetara. Mobilizazioa Miribillako Samsic enpresaren egoitzatik hasi dute, eta Limpiezas Garnica parean amaitu.
ELA sindikatuak adierazi duenez, sektoreko lanaldi osoko soldatak ez dira urtean 16.000 eurora iristen –gogorarazi du garbitzaile askok lanaldi erdiko kontratuak dituztela–. Soldata arrakala amaitzeko, hileko 1.200 euroko soldata galdegin dute langileek, hamabost ordainsaritan.
Martxotik dihardute langileek gatazkan, eta bihar ere beste greba egun bat izango dute sektoreko garbitzaileek. 11:00etan Bilboko Plaza Biribiletik abiatuko dira, eta Kale Nagusian amaitu, Cebek patronalaren egoitza parean.
