Gizon batek anaia hil du bart gauean Tafallan (Nafarroa). Foruzaingoak jakinarazi duenez, hiltzaileak bere burua entregatu du 06:30ak aldera, eta kasua ikertzen ari dira. Hildakoak 50 urte zituen; hiltzaileak, berriz, 44, eta aurrekari penalak ditu droga trafikoagatik.
Hilketa San Martin Unx kalean gertatu da, bi anaiak elkarrekin bizi ziren etxean. Hiltzaileak bi sastakada eman dizkio anaiari, bat lepoan eta bestea aurpegian. Drogen edo alkoholaren eraginpean ote zegoen jakiteko egin dizkioten probetan negatibo eman du. Foruzaingoaren arabera, bi senideen arteko harremana ez zen ona, eta aurrez ere izan zituzten liskarrak.