«Beste eraso matxista bat Larrea auzoan. Autodefentsa deia kuadrilla eta herrian». Horrela salatu dute Zornotzako (Bizkaia) mugimendu feministako kideek larunbat goizaldean Zornotzako auzo batean gertatutako eraso matxista. Anboto.org hedabideak eman du eraso matxistaren berri, eta, zehaztu dituen datuen arabera, larunbat goizaldean gertatu zen, plazatik 900 metro ingurura, Larrea auzoan.
Mugimendu feministaren antzera, gaitzespen oldera batu da Zornotzako Udala ere, eta elkarretaratze batera deitu du gaur arratsalderako: 18:30ean bildu dira, plazan. Dozenaka lagunek egin dute bat protestarekin, eta irmo azaldu dute gaitzespena. Adierazpen instituzional bat ere plazaratu du, eta nabarmendu dute «emakumeen bizitzaren, askatasunaren, duintasunaren eta erabateko herritartasunaren aurka egiten duten eraso ororen aurka egiteko konpromiso irmoa» dutela. «Emakumeenganako indarkeria emakumeen eta gizonen arteko ezberdintasunaren adierazle bortitzena da», gaineratu dute idatzian.
Orain dela bi aste beste bi eraso salatu zituzten herrian; horietako bat Larrea auzoan.