2010etik izoztuta egon dira babes ofizialeko etxebizitzen gehienezko prezioak, eta horiek goititzeko agindua argitaratu du gaur EAEko Aldizkari Ofizialak. Bizitoki publikoen eraikuntza sustatzeko helburuz, prezioak «kostu errealera» moldatuko ditu Jaurlaritzako Lurralde Plangintza, Etxebizitza eta Garraio Sailak. Eraikuntza sektorearen eskakizuna ere bada neurri hori: eraikuntza kostuak garestitu egin dira azken hilabeteetan, eta «egungo prezioetan ezin da etxerik eraiki», Bieba Bizkaiko eraikuntza patronalaren hitzetan.
Araubide orokorreko etxebizitzen salneurriari dagokionez, prezioak %11,9 eta %13,95 artean igoko ditu Jaurlaritzak —udalerri bakoitzaren eta eraikuntza kostuen igoeren arabera—. Dena dela, sailak jakinarazi du 2010etik honako inflazio metatu (ia %17) azpitik dagoela garestitze hori.
Alokairuen eta aldi baterako bizitokietarako kanonak berdin mantenduko ditu Jaurlaritzak. Etxebide zerbitzuaren datuen arabera, alokairu eskatzaileen batez besteko diru sarrerak jaitsi egin dira azken agindutik gaurdaino.
Babes ofizialeko bizitoki tasatuei dagokienez, gehienezko prezioa merkatuko dute, %0,33 eta %10,61 bitartean. Erreferentzia prezioa kontuan hartuz gero, EAEko etxebizitzen gehienezko prezioa «estatuko handienetako bat da», zehaztu dute aldizkari ofizialean.