Segurtasun indarrek goizaldean desegin dute manifestariek Kolonbo hirian zuten kanpaleku nagusia. Ranil Wickremesinghe presidenteak 72 orduko epea emana zien oposizioko kideen kanpalekua hustu eta presidentearen idazkariaren jauregitik joateko, eta haiek agindua betetzeko konpromisoa hartua zuten. Baina Polizia eta militarrak lehenago agertu dira gunera, eta indarrez sakabanatu dituzte manifestariak, baita bederatzi lagun atxilotu ere.
Manifestarien arabera, segurtasun indarrek hainbat orduz eduki dituzte kanpalekuan itxita, eta kolpeka oldartu zaizkie bertatik irteten ahalegindu direnei. Oposizioak gogor salatu du erasoa, baita Sri Lankako mugimendu zibilek ere.
Kolonboko gune horretan hasi ziren gerora erbestera ihes egin zuen Gotabaya Rajapaksa presidente ohiaren aurkako protestak. Herrialdea krisi ekonomiko zailean dago, inflazioa %54koa da, eta herritarren bi herenek zailtasunak dituzte elikatzeko. Sri Lanka ordainketa etenduran sartu zen iragan apirilaren 12an, eta ez du dirurik erregaiak eta elikagaiak inportatzeko.
Bien bitartean, gobernua osatzeko urratsak egiten jarraitzen dute parlamentuan. Gaur lehen ministro berriak egin du karguaren zina, Dinesh Gunawardenak. Rajapaksa presidente ohiaren kabineteko burua zen Gunawardena.
