Lan heriotza baten berri eman du LAB sindikatuak: hil egin da uztailaren 15ean larri zauritu zen langile bat. AHT abiadura handiko trena eraikitzeko lanetan ari zela izan zuen lan istripua beharginak, Tafallan (Nafarroa). Hala, sindikatuaren arabera, 46 dira gutxienez aurten lanean hildakoak Euskal Herrian.
LABek doluminak helarazi dizkie senideei eta gertukoei, eta salatu du istripua gertatu zenean jarduera asko etenda zeudela; ez, ordea, AHTaren lanak. «Nafarroan hainbat sute larri zeuden bitartean eta jarduera asko geldirik zeudela, AHTaren arduradunek erabaki zuten jarduerarekin jarraitzea, langileak arrisku handiko bero baldintzetan lan egitera behartuz eta, ondorioz, lan istripu bat izateko aukerak biderkatuz», salatu du sindikatuak.
LABek gogora ekarri du, gainera, langile «ugari» hil direla jada AHTa eraikitzeko lanetan, «lan horiek egiteko lan baldintza eskasak agerian utziz». Azken istripu hori «serio eta sakon» ikertzeko eskatu du sindikatuak, baita «Euskal Herriko AHTaren obra guztiei segurtasun arloko auditoria bat» egiteko ere.
