Albistea entzun

Ikastolak

Mende erdia ospatzera

Zuberoako ikastolen ibilbidea memoria lan batekin oroitaraziko dute, eta ekitaldi anitzekin ospatuko. Irailaren 10ean hasi eta ekainaren 24an bukatuko dira ospakizunak

Eperra ikastola.
Eperra ikastola. Joanes Etxebarria - Iparraldeko Hitza Tamaina handiagoan ikusi

Joanes Etxebarria - Iparraldeko Hitza -

2022ko uztailak 30

Zuberoan, ikastola batean egin zen lehen sartzea 1972ko irailean izan zen: Maulen. Garai hartatik, Basabürüan beste ikastola bat sortu eta Sohütako Eperra ikastola ehun haurretara heltzeko, mende erdiko ibilbidea egin dute; besteetan bezala, borondatezko lanez josirik. Bidea argitan ezarri, eta urteburua ospatu nahi dute orain ikastoletako ikasle ohiek, gurasoek eta langileek, ekitaldi desberdinak proposatuz.

Lehen saioa ikasturte hastapenean izanen da, Elsa Oilarj-Ines zuzendariaren dokumentalaren aurkezpenarekin. Nortarzünak filmarekin, ikastolako belaunaldi baten segipena egin du egileak; 2011. urtean sortu haurrak ikastolara sartu zirelarik, 2014an hasi zen filmaketa. Ikasturteetako momentu desberdinetan, kanpoko pausa momentuetan, belaunaldi bereko haurrak filmatu ditu Oilarj-Inesek zortzi urtez, haien lehen egunean hasirik eta aurten bukaturik; heldu den ikasturtean kolegiora pasatuko diren haurren arteko harremanak ikertzea zuen xede, besteak beste.

Irailaren 10ean aurkeztuko du filmaren lehen partea publiko zabalaren aitzinean, Maulen. Bezperan, lehenik haurrei eta ondotik familiei aurkeztuko die, intimitatean. Sei ataletan zatitu du lana, eta lehen hirurak erakutsiko ditu hasteko. Bezperan ikusiko dute, lehen aldiz, ikasle horien gurasoek. Ikasle horietarik baten ama eta ikastolako andereño Oihana Larrandabürük dioenez, «etxeko gisa», ez dakite batere «zer agertuko den». Aurkezpen egunean hitzaldi bat ere antolatuko dute, ikertzaile batek filmak erakusten dituen harremanak azter ditzan.

Euskalgintzaren bidea bakarra ez, baina komuna denez gero, Xiberoko Botza irratiarekin zubi bat ere eraikiko dute ospakizunetan. Uhinetan iragan 40 urteak ospatzen dituenez, ikastolek irratiaren «lekukoa» hartuko dute kantaldi gaualdi batean, Muskildin. «Urte anitzez gauzak elkarrekin egin dituzte Xiberoko Botzak eta ikastolak; kontzertuak eta halako gauzak», Larrandabürük dioenez. Beraz, irratiaren urtebetetzetik ikastolen urtebetzera, «lekukoa» pasatuko da azaroaren 5ean, kantaldi eta kontzertu gaualdi batean.

Memoria eta besta

Ikastola orotan bezala, ikasle multzo ttipi batekin hasi zuten ibilbidea, eta, ikastola gehienetan bezala, handitu da egitura; gaur egun, Zuberoak bi ikastola ditu, eta ehun ikaslez goiti. Urtebetetzea aitzakia on bat da memoria landu eta bidea ospatzeko, Maika Etxekopar, Eperrako etxekoaren ustez: «Historia hori nahi dugu argitan ezarri eta bildu, forma bat eman erakusketa batekin. Nahi dugu ibilbide hori ospatu, ederra izan baita, eta jende anitzek indar ezarri baitute horretan. Urte orotan galdekatu, markatu eta euskararen presentzia indartu dute Zuberoan, programatuko ditugun gertakari batzuen bidez».

Sohütako ikastola

Urtebetetzea antolatzen duen taldeak deialdi bat zabaldu du «memoria bilketa» lanerako laguntza eske, bide horren lekukotasunak biltzeko dokumentu desberdinetan —argazki, bideo edo bestelako dokumentuak—. 2012an, ikastolen 40. urteburua kari, Xiberoko Ikastoletako Ikasle Ohien elkarteak jadanik bilketa lan bat egin zuen ikuskizun baterako, eta hori ere baliatuko dute erakusketa bat sortzeko, beharbada bai eta liburu bat ere.

Memoria, batetik; eskerra, bestetik. «Urtez eta urtez lagundu duten laguntzaile guztiendako eskerrak. Eperra ikastola asteburuz asteburu eraikirik izan da, beste probintzietatik jende parrasta bat horra zen, Bretainiatik ere bai; leku guztietarik… Nahi genituen horiek eskertu», zehaztu du Larrandabürük. Horregatik, ikasturte bukaerako bestan, 2023ko ekainaren 24an, «ikastolatik iragan diren, hor direnen eta laguntzaile”»guztien besta egin nahi lukete antolatzaileek.

Agenda betea

Iraila eta ekaina artean, halere, hilabete oroz agenda markatu nahi dute ospakizunetan. Euskaraldiaren barruan, hain zuzen, ikastoletako hastapenak aipagai izanen dira hitzaldi batean. Bertso afari musikatu bat ere izanen da negu partean. Haurrendako gehiago, Gure Zirkuarekin data bat finkatzen ari dira, Ipar Euskal Herrian eginen duten bigarren agerraldia Zuberoan izateko gisan. Kontzertu bat antolatzea ere pentsatzen ari dira.

Ekain hastapenean, ospakizunak iragartzeko egin zuten agerraldian, antolaketa taldean sartzeko deialdia ere egin zuten guraso, irakasle eta ikasle ohiek, Etxekoparrek oroitarazi duenez: «Anbizio handi batekin abiatu gara, enbeia dugu urte osoan zerbait atxiki, 50 urte ez baita guti. Dei bat zabaltzen dugu, beraz, jendeek sentitzen badute gurekin ospatzeko enbeia, ez daitezen duda gurekin harremanetan sartzeko». Data batzuk finkatu arau ezagutaraziko dituzte, irailaren 10ean ezarririk lehen saioa, eta ekainaren 24an azkena.

Sareko BERRIAzalea:

Udazkenean, BERRIAlagun egiteko pausoa eman dezazun, eskaintza bat egin nahi dizu BERRIAk. Herri baten kulturaren plaza da BERRIA. Kultur egitasmo, dinamika eta ekitaldi anitzen erakustoki. Euskal kulturaren inguruko informazioaren plaza handia. Azaroan eta abenduan, Euskaraldiak, Bertsolari Txapelketa Nagusiak eta Durangoko azokak hartuko dituzte, besteak beste, BERRIAren orrietako asko, paperean eta webgunean.

Albiste asko irakurriko dituzu, segur aski webgune honetan bertan. Eta eskari bat egin nahi dizugu: har ezazu konpromisoa irakurtzen duzunarekin. Irakurleen babes ekonomikoa funtsezkoa da BERRIAren etorkizuna ziurtatzeko.

Albiste gehiago

Donostialdeko ESIko zerbitzuburuek egindako agerraldia, atzo, Donostian. ©JON URBE / FOKU

«Harreman asimetrikoak» hausteko eskatu diote Jaurlaritzari

Edurne Begiristain Iosu Alberdi

Donostialdeko ESIko zerbitzuburuek kontsultarako mahai bat proposatu diote Gasteizi, bitartekari lana egiteko

Jonan Fernandez, atzo, gazteen emantzipaziorako estrategia aurkezten. ©IREKIA

Emantzipatzeko laguntzak jasoko dituzte 25 eta 29 urte artekoek

Edurne Begiristain

Jaurlaritzak gazteen emantzipazioa sustatzeko estrategia ondu du. 2030erako 29 urtera jaitsi nahi du gurasoen etxea uzteko adina

Antton Kurutxarri EEPko lehendakaria agerraldi batean ©Guillaume Fauveau

EEPko ordezkariek Parisen isiltasuna deitoratu dute

Garazi Aduriz Zuñeda

Irailean egin zuten bilkura Frantziako Hezkuntza Ministerioarekin. Azterketak euskaraz egiteko eskubidea aipatu zuten nagusiki.

Donostiako ospitalaren atarian gaur goizean egindako protesta bilkura ©Javier Etxezarreta / Efe

Donostia ospitaleko 150 langile inguru batu dira gaur ESIko zerbitzuburuen elkarretaratzera

Edurne Begiristain

Osakidetzaren eta Eusko Jaurlaritzaren kudeaketa salatzeko, protesta jendetsua egin dute goizean ospitaleko atarian.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Hitzen, ekintzen eta errimen eztanda. Herri bat BERRIAren kulturaren plazan. Baliatu udazkenean BERRIAlagun egiteko eskaintza.