«Gora 2023ko Baionako bestak!». Oihu horrekin bidali dute hibernatzera Leon Erregea Lapurdiko hiriburuan. Bart eginiko ekitaldiarekin amaitu dira hiriko bestak.
90 urte bete dituzte aurten Baionako jaiek. Jendetza batu da herriko etxearen aurrean, eta zapi gorria kendu dute, jaiei «datorren urtera arte» esateko. Aturritik jaurtitako su festarekin amaitu da jaia.
Agintarien arabera, gaua lasai samarra izan da. Edonola ere, ziztadengatik hamar salaketa jarri dituzte, eta pertsona bat atxilotu dute horren harira. Beste egunetan, denera, 122 salaketa jarri dituzte ziztadengatik.
Horrez gain, beste sei pertsona atxilotu dituzte lapurretan, borrokan eta halakoetan aritzeagatik. Eta gidariei eginiko 450 alkohol kontroletan, sei gidariri isuna jarri diete.
Larrialdi zerbitzuek 131 pertsona artatu behar izan dituzte, eta horietako zazpi adin txikikoak ziren.
