55 urteko txirrindulari bat hil da gaur Igantzin (Nafarroa), Irrisarri Land abentura parkean. Goizeko 10:55 aldera gertatu da ezbeharra: jauziak egiteko pista batean zebilen gizona, eta eroriko larria izan du. Kaskoa jantzita zeraman, baina, hala ere, garuneko lesio traumatiko bat izan du, eta arnasa hartzeari utzi dio.
Berehala deitu diete larrialdi zerbitzuei, baina haiek ezin izan dute ezer egin gizona berpizteko. Orain autopsia egingo diote hilotzari, eta gertatutakoa argitzeko ikerketa zabaldu du Foruzaingoak. Hildakoa gipuzkoarra zen, nahiz eta Hendaian (Lapurdi) bizi zen.
Irrisarri Land parkeko arduradunek ohar bat plazaratu dute hildakoaren senideei eta lagunei doluminak emateko. Esan dute autopsiaren emaitzen zain daudela zer gertatu den zehazki jakiteko.
