Inflazioaren eragina zerga bilketan ere islatzen ari da azken hilabeteetan, eta uztailera arteko datuak igoera nabarmena ekarri du aurreko urteko epe berarekin alderatuta: %10,2. Araba, Bizkai eta Gipuzkoako foru ogasunek 9.393,5 milioi euro bildu dituzte urteko lehen zazpi hilabeteetan. Bizkaiak bildu du gehien: 5.496,4 milioi euro (+548,8); Gipuzkoak 2.655,5 milioi metatu ditu, eta Arabako ogasunak, 1.241,6 milioi. Dena den, Araban hazi da gehien bilketa urte arteko tasan: %12,3; Bizkaian %11,1 igo da; eta %7,6 Gipuzkoan.
Bizkaiak bildutako 5.496,4 milioi horietatik %10,4 zerga zuzenenen bidez lortu ditu, hau da, 2.821,7 milioi euro. PFEZari dagozkie 2.093,4 milioi euro: %8,6ko igoera. Sozietate zergak, enpresen irabaziak zergapetzen dituen zergak alegia, 555,9 milioi euro utzi ditu Bizkaiko ogasunean, %21,8 gehiago. Zeharkako zergen bidez, berriz,2.194,4 milioi euro bildu ditu ogasunak (+%7,8). BEZak 1.498,6 milioi utzi ditu (+%7,9), eta hidrokarburoen zergak, berriz, 481,1 milioi (+%8,1).
Gipuzkoak bildutako 2.655,5 milioien artean, 994,7 errenta zergari esker lortu dira (+%2,5); beste 104,4 milioi utzi ditu sozietate zergak, iazko epe berean baino 24,6 gehiago. BEZak 745,1 milioi eraman ditu kaxara (+% 8,4) eta hidrokarburoenak 244,4 (+%6,8).
Arabak 1.241,6 milioi bildu ditu urtarrilaren eta uztailaren artean, 543,9 zerga zuzenen bidez eta 549,1 zeharkakoen bidez. PFEZak 463,3 milioi euro utzi ditu Arabako Ogasunean (+%11), eta sozietate zergak 43 (+%28,6). BEZak, berriz, 354 milioiko ekarpena egin du (+%6,7), eta hidrokarburoen zergak, 133 milioi eurokoa (+%10,5).