Alerta laranja ezarri zuten atzo Ipar Euskal Herrian, uholde arriskuagatik. Eurite indartsuak izan ziren, eta, euriaren ondorioz, ur araztegiak gaindikatu ziren Ipar Euskal Herriko eremu askotan. Ondorioz, euriak ura kutsatu zuen, eta Lapurdiko hondartza guztiak itxi behar izan zituzten, prebentzioz. Guztira 34 hondartza itxi zituzten. Gaur goizean, ur kalitatearen proba egin ondotik, Miarritzeko, Bidarteko eta Angeluko hondartzak ireki dituzte berriz. Hendaia eta Donibane Lohizune bitarteko hondartzak, ordea, itxita daude oraindik.
Gaur berriz analizatuko dute ura, eta horren arabera erabakiko dute itxita dauden hondartzak ireki ala ez.
