Uda honetan turismoa sasoi betean dagoela erakusten dute hotelek uztailean iritsitako kopuruek; atzean gelditu direla COVID-19ak eta pandemiari aurre egiteko neurriek bisitari kopuruan ekarritako murrizketak.
Eustaten arabera, iazko erdipurdiko kopuruak aise gainditu dituzte aurten Araba, Bizkai eta Gipuzkoako hotelek. Adibidez, sarreren kopurua iazko uztailekoa baino %31,2 handiagoa izan da, eta gaualdiak %34,8 gehiago izan dira.
Igoera handiak izanda ere, ezin da ahaztu iazko uztailean turismoak oraindik gogotik igarri zituela pandemiari aurre egiteko neurrien ondorioak. Horren erakusle da hotelen betetze tasa %57,6 izan zela iazko uztailean eta, aldiz, tasa %72ra iritsi dela aurten. Hotelen betetze mailak, gainera, pandemia aurreko datuak ere gainditu ditu uztail bero honetan. 2019ko uztaileko %71,1eko betetze tasa ere gainditzeraino.
Bidaiaren jatorriari begira, hotelek iaz baino bezero gutxiago izan dituzte Hego Euskal Herrikoak, 5.121 sarrera gutxiago. Iazko uztaileko sarreren %14,2 izan ziren Hegoaldeko euskal herritarrenak, eta, aurten, soilik %9,5.
Atzerritarrei dagokienez, Espainiako eta Frantziako estatuetatik etorri dira aurtengo bidaiarien %60,6. Eta gainerako herrialdeetatik, batez ere AEBetako jatorriko sarrerak (21.634), britainiarrenak (15.287) eta Herbehereetatik etorritakoenak (14.864).