Albistea entzun

Terrorismoa goratu izana ukatu dute Berangoko hiru lagunek Auzitegi Nazionalean

Martxoaren 13an Ibai Aginaga preso ohiari egindako ongietorriaren harira daude inputatuta. Epaileak «oraingoz» ez du erabaki beste eginbiderik egitea.

Auzitegi Nazionalean deklaratu dute Berangoko hiru lagunek.
Auzitegi Nazionalean deklaratu dute Berangoko hiru lagunek. J. Danae / FOKU Tamaina handiagoan ikusi

Oihane Puertas Ramirez -

2022ko abuztuak 22

Espainiako Auzitegi Nazionalean deklaratu dute gaur Berangoko (Bizkaia) hiru lagunek, martxoaren 13an Ibai Aginaga preso ohiari egindako ongietorriaren harira. «Terrorismoa goratzea» leporatzen diete hirurei; akusatuek, ordea, ukatu egin dute hori egin izana; azaldu dute ekitaldi «pribatua» izan zela, eta ez zutela deliturik egin. Europa Press albiste agentziaren arabera, epaileak «oraingoz» ez du erabaki beste eginbiderik egitea, eta epaitegia Polizia Judizialari eskatutako txostenen zain dago.

Basauriko (Bizkaia) kartzelatik atera zen Aginaga, hogei urte inguru espetxean egon ostean, eta ongietorria egin zioten Berangoko frontoian. Vox talde politikoak, Villacisneros fundazioak eta Dignidad y Justicia taldeak salaketa aurkeztu zuten ekitaldiaren harira, eta, horri erantzunez, ikerketa bat abiatu zuten. Kandaru Kultur Elkarteko hiru kide inputatu zituzten: Ismael Moreno magistratuak egotzi zien ekitaldiaren antolaketan parte hartu izana.

Elkarteak salatu du «kriminalizazio kanpaina mediatiko, politiko eta judizial bat» abiatu dutela haren kontra, ekitaldiaren aurretik eta horren ondoren. Batez ere, El Correo hedabideak kanpaina hori elikatzeko izan duen «protagonismoa» nabarmendu du. Horrez gain, adierazi du Berangoko Udalak ere jarri dizkiela zigorrak: hiru hilabeteko bina debeku udal guneak erabiltzeko, eta 500 euroko bina isun, frontoiko paretetan pankartak itsasteagatik eta frontoiaren «erabilera desegokiagatik». Elkarteak azaldu du helegitea jarri diela bi isunei, baina ez duela erantzunik jaso.

Kandaruren arabera, horrekin guztiarekin, herrian «errotuta» dauden bi baloreri «jazarri» nahi zaizkie, eta, aldi berean, horiek «zigortu»: batetik, amnistia gatazka politikoaren erroaren «gainditze» moduan ulertzea eta, bestetik, errepresioari aurre egiten dioten militante politikoen «duintasuna» aitortzea. Horiek horrela, elkarteak berretsi du «herri lanarekin» jarraituko duela, herria eraikitzen eta Euskal Herri «libre» baterako bidea egiten.

Inputatuei elkartasuna adierazteko, elkarretaratzea egingo dute gaur Berangoko Gudarien plazan, 20:00etan.

Sareko BERRIAzalea:

Udazkenean, BERRIAlagun egiteko pausoa eman dezazun, eskaintza bat egin nahi dizu BERRIAk. Herri baten kulturaren plaza da BERRIA. Kultur egitasmo, dinamika eta ekitaldi anitzen erakustoki. Euskal kulturaren inguruko informazioaren plaza handia. Azaroan eta abenduan, Euskaraldiak, Bertsolari Txapelketa Nagusiak eta Durangoko azokak hartuko dituzte, besteak beste, BERRIAren orrietako asko, paperean eta webgunean.

Albiste asko irakurriko dituzu, segur aski webgune honetan bertan. Eta eskari bat egin nahi dizugu: har ezazu konpromisoa irakurtzen duzunarekin. Irakurleen babes ekonomikoa funtsezkoa da BERRIAren etorkizuna ziurtatzeko.

Albiste gehiago

Abeberriren omenezko ekitaldia, atzo, Miarritzen. ©GUILLAUME FAUVEAU

Abeberriren ibilbide oparoa ohoratu dute

Oihana Teyseyre Koskarat - Garazi Aduriz

«Hats luzeko» abertzale eta kulturgilea izan dute gogoan. Eragile anitzetako ordezkariak izan dira miarriztarrari egindako omenaldian

Eba Blanco (erdian), azaroko biltzarrean, idazkari nagusi izendatua izan ondoren. ©JAVIER ZORRILLA / EFE

EAren primarioak berriz egiteko aginduaren aurkako helegiteak aztertuko dituzte

Xabier Martin

Espainiako Auzitegi Gorenak tramiterako onartu du EAren eskaera, eta alderdiaren primarioak berriz egiteko agindu zuen probintzia auzitegiaren epaia balekoa den ala ez erabakiko du.

Juan Alberto Belloch, artxiboko irudi batean. ©Javier Cebollada / EFE

Juan Alberto Belloch: «Galindo, borrokalari antiterrorista moduan, onena zen»

Iosu Alberdi

Justizia eta Barne ministro ohiak adierazi du bera izan zela Galindori jeneral kargua ematea ahalbidetu zuena, nahiz eta jakin atxilotuak torturatzen zituela.

Donostiako Renferen geltokia. ©GORKA RUBIO / FOKU

Beste geltoki bat aldiriko trenen transferentziaren lokarria askatzeko

Xabier Martin

Laster egingo dute Gasteizek eta Madrilek aldiriko trenen eskuduntza gerturatuko lukeen bilera

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...