Albistea entzun

Suteak

Hondamendi eremu izendatu dituzte Hego Euskal Herriko suteetan kaltetutako guneak

Ministroen Kontseiluak «Babes Zibileko Larrialdi batean larriki kaltetutako eremu» izendatu ditu Zanbrana, Esa eta Zarrakaztelu

Uztailean sute bat piztu zen Zarrakaztelun.
Uztailean sute bat piztu zen Zarrakaztelun. NAFARROAKO SUHILTZAILEAK Tamaina handiagoan ikusi

Oihane Puertas Ramirez -

2022ko abuztuak 23

Espainiako Ministroen Kontseiluak hondamendi eremu izendatu ditu Hego Euskal Herriko suteetan kaltetutako zenbait gune, «Babes Zibileko Larrialdi batean larriki kaltetutako eremu» izan direlako. Horien adibide dira Zanbrana (Araba) –abuztuko suteengatik–, Esa (Nafarroa) –ekaineko suteengatik– eta Zarrakaztelu (Nafarroa) –uztailean izandako suteengatik–.

Isabel Rodriguez Espainiako Gobernuko bozeramaile eta Lurralde Politikako ministroak adierazi duenez, gaur onartutako akordioaren bitartez, kaltetutako eremuetara bideratutako laguntzak kudeatzeko eta horiek emateko epeak «murrizteko» mekanismoak aktibatuko dituzte.

Berreskuratze neurriei dagokienez, besteak beste, 18.000 euro banatuko dituzte heriotzagatik edo ezintasun absolutu eta iraunkorragatik; suteetan ohiko etxebizitza «erabat» suntsitu bada, gehienez 15.120 euroko diru laguntza banatuko dute, eta etxebizitzaren egiturari eragiten dioten kalteak konpontzeko, balorazio teknikoaren %50erainoko laguntza banatuko dute, 10.320 euroraino.

Premiazko etxeko tresnak suntsitu edo kaltetu badira, berriak jartzeko edo horiek konpontzeko 2.580 eurorainoko diru laguntza eskainiko dute. Erabilera orokorreko elementu komunak konpontzeko, berriz, gehienez Aseguruen Konpentsazio Partzuergoak egindako balorazio teknikoaren %50 kubrituko dute, 9.224 euroraino.

Industriako, merkataritzako eta zerbitzuetako establezimenduen titularrentzako ere jarriko dituzte 9.224 eurorainoko diru laguntzak, eta nekazaritza, abeltzaintza, baso eta itsas akuikulturako produkzioetan izandako kalteengatiko laguntzak ematea aurreikusten dute. Akordioak, gainera, gidabaimenak bikoizteko Trafikoko Buruzagitza Nagusiaren tasetatik salbuesteko aukera aurreikusten du.

Horiez gain, beste laguntza neurri batzuk hartzea aurreikusten du dekretuak, horiek garatzeko eskumena duen sail bakoitzak emandako jarraibideetan oinarrituta. Horrela, laneko eta Gizarte Segurantzako neurriak hartzeko aukera egongo da, zergetan onurak egon daitezke, eta tokiko korporazioek ere laguntzak jasotzeko aukera izango dute.

Guztira hamabost autonomia erkidego izendatu dituzte «Babes Zibileko Larrialdi batean larriki kaltetutako eremu»; guztiak Kantabria eta Asturias izan ezik. Rodriguezek gogorarazi du ekainetik gaur egunera arte 120 baso sute inguru gertatu direla Espainiako Estatuan, eta 200.000 hektarea baino gehiago kaltetu direla. Sute horietan hiru lagun hil dira, eta 27.000 bat pertsona etxetik atera behar izan dituzte. Rodriguezen arabera, sute horiek «ezaugarri desberdinak» izan dituzte, klima aldaketaren ondorioz.

Sareko BERRIAzalea:

Udazkenean, BERRIAlagun egiteko pausoa eman dezazun, eskaintza bat egin nahi dizu BERRIAk. Herri baten kulturaren plaza da BERRIA. Kultur egitasmo, dinamika eta ekitaldi anitzen erakustoki. Euskal kulturaren inguruko informazioaren plaza handia. Azaroan eta abenduan, Euskaraldiak, Bertsolari Txapelketa Nagusiak eta Durangoko azokak hartuko dituzte, besteak beste, BERRIAren orrietako asko, paperean eta webgunean.

Albiste asko irakurriko dituzu, segur aski webgune honetan bertan. Eta eskari bat egin nahi dizugu: har ezazu konpromisoa irakurtzen duzunarekin. Irakurleen babes ekonomikoa funtsezkoa da BERRIAren etorkizuna ziurtatzeko.

Albiste gehiago

Idurre Eskisabel. ©Euskalgintzaren Kontseilua

Idurre Eskisabel izango da Euskalgintzaren Kontseiluko idazkari nagusi berria

Julen Aperribai

Karguan hamabi urte egin dituen Paul Bilbao ordezkatuko du Durangon, Kontseiluaren 25. urteurreneko ekitaldian. Lehentasuntzat jo du «kohesio sozialaren eta justizia sozialaren arloan» lan egiten duten eragileekin aliantzak sendotzea.

Feministalidaren hamazazpigarren edizioaren aurkezpena, gaur, Donostian ©Andoni Canellada / FOKU

‘Ahoa narras’ izenburupean egingo dute Feministaldiaren hamazazpigarren edizioa

Isabel Jaurena

Azaroaren 30etik abenduaren 3ra bitarte izanen da jaialdia, Donostiako Tabakaleran.

Sanferminetako talde bortxaketaren sententziaren aurkako protesta, 2016an, Nafarroako Auzitegiaren aurrean. ©IÑIGO URIZ / FOKU

Nafarroako Auzitegiak ez ditu murriztuko sexu indarkeriagatiko zigorrak, lege berrian aplikagarri baldin badira

Ion Orzaiz

Sententziak kasu bakarrean berrikusiko dituzte atzerako eraginez: espetxeratuei ezarritako kondena handiagoa baldin bada soilik baietz da baietz legean delitu horri dagokion gehienezko zigorra baino.

Donostiako geltokia, artxiboko irudi batean. Gaur zen martxan jartzekoa behin-behineko geltoki berria. ©Gorka Rubio / FOKU

Renfeko bidaiariek lineako autobusean eginen dute Andoain eta Irun bitarteko ibilbidea

Berria

Goizetik etenda dago trena, eta, berriz ere martxan jarri bitartean, lineako autobusean joan beharko dute bidaiariek Andoain eta Irun bitartean (Gipuzkoa). Gaur zen martxan jartzekoa Donostiako behin-behineko geltokia.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Hitzen, ekintzen eta errimen eztanda. Herri bat BERRIAren kulturaren plazan. Baliatu udazkenean BERRIAlagun egiteko eskaintza.