Nafarroako Gobernuak kaleratu berri ditu abuztuaren 15etik 21erako astean COVID-19ak izan duen eraginaren inguruko datuak. Horietan ikusten denez, bosgarren astez segidan COVID-19aren datuak beherantz egiten ari dira Nafarroan.
Positibo kopuruari dagokionez, 298 pertsonak eman dute positibo PCR proban, aurreko astean baino %26k gutxiagok. Oro har, helduenei erasaten die gogorren gaitzak, eta datuak onak dira adinari begiratuta ere: 60 urte baino gehiago dituzten pertsonen artean %24 jaitsi dira kasuak, aurreko astearekin alderatuta.
Positibo kopuruan ez ezik, ospitaleratzeetan eta hildakoetan ere nabari da jaitsiera. Azken astean, hamabost pertsona ospitaleratu behar izan dituzte gaitzak jota, aurreko astean baino zazpi gutxiago. Gainera, horietako bat bera ere ez dute ZIUn sartu behar izan. Hildakoen kopurua, berriz, erdira jaitsi da astebetean: lau pertsona hil dira COVID-19agatik.
Tximino baztangaren 33 kasu
COVID-19aren datuez gain, tximino baztangarenak ere eman ditu Nafarroako Gobernuak. Azken astean beste hiru pertsonari atzeman diote gaixotasuna; hortaz, orotara, 33 kasu identifikatu dituzte Nafarroan. Guztiak gizonak dira, 20 urtetik 70era bitartekoak. Ez dira kasu larriak izan, eta ez dute inor ospitaleratu behar izan.
Eskoletan, mugarik gabe
Naiz hedabideak jakinarazi duenez, Ipar Euskal Herriko ikastetxeetan ez dute mugarik izango COVID-19agatik. Haren esanetan, Frantziako Hezkuntza Ministerioak eta Osasun Ministerioak sindikatuei helarazi diete irailaren 1etik eskoletan eduki beharko duten protokoloa, eta bertan ageri da eskola guztiak aurrez aurre izango direla, ez dutela maskararik erabili beharko, ez dutela edukiera mugatuko eta ez dutela distantziarik mantendu beharko.
