Argentinako Poliziak 35 urteko gizon bat atxilotu zuen atzo Cristina Fernandez presidenteordearen kontra ostegun gauean izandako atentatuarekin lotuta. Argentinako Gobernuak jakinarazi duenez, jatorriz brasildarra da atxilotua, eta aurrekariak ditu armak legez kanpo edukitzeagatik. Clarín egunkariaren arabera, martxoan ere atxilotu zuten. Anibal Fernandez Segurtasun ministroak esan du atzeman zutenean arma bat zuela. Epaitegiko zenbait iturrik zabaldutako informazioaren arabera, atxilotuak uko egin dio epailearen aurrean deklaratzeari.
Ostegun gauean izan zen atentatua, Argentinan 21:00ak zirela (02:00ak Euskal Herrian). Argentinako telebista publikoaren irudietan ikusten denez, Fernandez bere etxe aurrean zeuden jarraitzaileak agurtzera hurbildu zenean gertatu zen: pertsona bat gerturatu zitzaion, eta pistola bat jarri zion burutik zentimetro batzuetara. Alberto Fernandez Argentinako presidenteak esan du tiro egiten saiatu zela, baina balarik ez zela irten. Ámbito egunkariaren arabera, bost bala zituen atxilotuaren armak.
Si en esta imagen estuviera un presidente de EEUU o de Francia nadie estaría ahora hablando de si de verdad la iban a matar o es un montaje. El arma es real, estaba cargada. Falló y por eso está viva.
— Cris García Casado (@criscasado__) September 2, 2022
Hechos, hechos, hechos. pic.twitter.com/GYXzSq49Lh
Argentinako presidenteak esan du Argentinan diktaduraren ostean inoiz izan den gertaerarik larriena dela. Gauerdia pasatu eta minutu batzuetara mintzatu zaie argentinarrei, telebistaz. Esan du indarkeria eta gorrotoa desagerrarazi egin behar direla diskurtso politikotik eta mediatikotik. Gaurko eguna jaiegun izendatu dute Argentinan, herritarrek atentatuaren kontrako mobilizazioetan parte hartu ahal izan dezaten. Argentinako Futbol Federazioak bertan behera utzi ditu gaurko futbol partidak, eta indarkeriaren kontra agertu da.
Atentatuak astindu egin du Argentina. Lehenagotik ere ez zen bare giroa. Cristina Fernandez iruzur auzi batean nahastuta dago. Argentinako presidente zela (2007-2015) herri lanen adjudikazioan iruzur egitea leporatzen diete Fernandezi eta Nestor Kirchner haren senarrari (2010ean hil zen). Guztira 39 milioi euroko iruzurra egin zutela kalkulatu du Diego Luciano fiskalak, eta hamabi urteko espetxe zigorra eskatu du harentzat.
Atentatuaren ostean, Cecilia Moreau Argentinako Diputatuen Ganberako presidenteak iragarri du bi ganberen arteko ikerketa batzorde bat osatuko dutela atentatua ikertzeko. Argentinako eta beste herrialde batzuetako agintariek gogor gaitzetsi dute atentatua. Mauricio Macri presidente ohiak esan du gertaera oso larria dela, eta azkar eta ondo argitu behar dela. Gaitzespen eta elkartasun mezuak bidali dituzte beste zenbaitek ere: Nicolas Maduro Venezuelako presidenteak, Gabriel Boric Txilekoak, Miguel Diaz-Canel Kubakoak, Evo Morales Boliviako presidente ohiak eta Lula da Silva Brailgo presidentegaiak.
