Urdaibai eta Orio nagusi lehen jardunaldian

Kontxako Banderako lehen jardunaldiko emaitzak

1. Urdaibai 19.21,56

2. Hondarribia 7,64ra

3. Donostiarra 7,70era

4. Getaria 23,42era

5. Orio 29,02ra

6. Zierbena 36,84era

7. Kaiku 56,74ra

8. Ondarroa 1.03,58ra

Urdaibai garaile, lehen jardunaldian

Urdaibaik estropada biribila egin du, eta kolpe handia eman die aurkari zuzenei. Denbora ofizialen zain, 19.21,43ko denbora egin du. Donostiarra bigarrena izan da, 7,70era; eta Hondarribia 7,77ra.

Urdaibai Kontxako badian sartzera doa, eta gaur Kontxako Bandera erabakitzeko dena alde dauka. 11 segundora dira Hondarribia eta Donostiarra.

Donostiarra Urdaibairen uberan sartu da, olatuek eta itsaslasterrak sortzen duten zikinkeria saihesteko asmoz.

Bermeotarrak sekulako estropada egiten ari dira, Aranberriren aginduetara. Donostiarrari jada zortzi segundo ateratzen dizkiote, eta 11 Hondarribiari.

Hamahirugarren minutua bete den honetan, Urdaibaik olatua hartu du, eta estropada burua hartu du. Donostiarrari hiru segundo ateratzen dizkio, eta bederatzi Hondarribiari.

Gorka Aranberri Urdaibaiko patroiak bigarren kaleari eutsi dio; Arkaitz Diaz Donostiarrako lemazaina, aldiz, istribor aldera jo du. Itsasoko epailea bi ontzi horien tartean sartu da, badaezpada.

Donostiarrak egin du denborarik onena: 9.51. Urdaibairi lau segundo atera dizkio, hamar Hondarribiari, hamahiru Zierbenari, eta 30 Ondarroari.

Urdaibai lehen kalera hurbildu da. Su batean doaz bai Bou Bizkaia bai Donostiarra. Torrekua traineruak zortzi segundo eder ateratzen dizkio Hondarribiari.

Lau minutu bete diren honetan, Donostiarrak hartu du estropada burua, baina Urdaibai segundo bakarrera dauka. Zierbena lau segundo atzerago doa, eta Ondarroa hamar. Une honetan, Igor Makazagaren taldeak lau segundo aterako lizkioke Hondarribiari.

Iñlaki Errasti Ondarroako entrenatzailea motordun ontzitik jarraitzen ari da estropada: Antiguako Ama-ko tostartetik kanpo geratzea erabaki baitu.

Urdaibaik, Kontxako Bandera irabazteko hautagai nagusiak, Hondarribiak egindako denbora du erreferentzia gisa: 19.29,20

Abiatu da bigarren txanda

Txanpa bizi-bizian irten dira lau ontziak.

1. Donostiarra

2. Urdaibai

3. Ondarroa

4. Zierbena

Denbora ofizialak

1. Hondarribia 19.29,31

2. Getaria 15,57ra

3. Orio 21,22ra

4. Kaiku 48,98ra

Hondarribia nagusitu da lehen txandan

Hondarribiak aise irabazi du lehen txanda. Denbora ofizialen zain, 19.29ko denbora egin du. Getaria Orioren aurretik helmugaratu da, hamabostera; San Nikolas, 21era. Kaiku 48ra heldu da.

Azken txanpan sartu dira lau ontziak, eta arraunkadak sarritu dituzte.

Hondarribiak Santa Klara uhartea igaro duen honetan, Getariari hamabi segundo ateratzen dizkio, eta hamabost Oriori. Kaiku zeharo atzean da, 40ra.

Getaria estropada ederra egiten ari da. Esperantza-k Oriorekin bigarren posturako lehia handia du. Hondarribiarengandik hamar segundora dira.

Hondarribia badoa: Getariari eta Oriori zortzi segundo ateratzen dizkie. Bitartean, Ioseba Amunarrizek, olatuek norabideak hala markatuta, laugarren kaletik estropadaren eremuaren erdialdera joateko erabakia hartu du.

Hondarribiak 10.02ko denbora egin du ziabogan. Getaria bost segundora heldu da, seira Orio eta hemezortzira Kaiku.

Arraunkadaz arraunkada, Hondarribia aurkariekiko aldeak handitzen ari da: Getariari eta Oriori sei, eta Kaikuri hamalau.

Ander Etxegoien Orioko patroiak zero kale aldera eraman du San Nikolas ontzira, errenpunpen ondorioz sortutako zikinkeria sahiesteko asmoz. Beste hiru ontziek, berriz, euren kaleei eusten diete.

Bost minutu bete direnean, Hondarribia dago estropada buruan. Getaria eta Orio bi segundora dira, eta Kaiku bostera.

Lehen bi minutuen ostean, ia parean dira lau ontziak. Kaiku segundu bat atzetik.

Hasi da gizonezkoen lehen txanda

Oraingoan bai, balekoa da irteera. Harridura eragin du epaileen erabakiak.

Lehen txandan Orio doa lehen kaletik, Getaria bigarrenetik, Kaiku hirugarrenetik, eta Hondarribia laugarrenetik. Ez da zigorrik izango lehen irteeragatik, baina ez dago argi zergatik ez den baliokoa izan irteera.

Bandera gorria

Hasi da gizonezkoen estropada, baina bandera gorria atera du epaileak.

Orio, lehen jardunaldiko azkarrena

Orio izan da Kontxako Banderako lehen jardunaldiko garailea, 10.37,52ko denborarekin.

2. Arraun Lagunak 2,16ra

3. Hondarribia 12,95era

4. Donostiarra 13,30ra

5. Tolosaldea 15,31ra

6. Hibaika 20,39ra

7. Cabo 22,13ra

8. Chapela 37,66ra

Lehen txandako denborekin alderatuta, Oriok eta Arraunek hamar segundo ateratzen dizkiete Tolosaldeari eta Hondarribiari.

Maniobraren ostean, Agirre Orioko patroiak San Nikolas ontzia bigarren kalera eraman du; Andrea Astudillo Arrauneko lemazainak, berriz, bere kaleari eutsi dio, hirugarrenari. Segundo batean dira bi ontziak.

Oriok 5,25eko denbora egin du (Tolosaldearen denbora bera); Arraun Lagunak-i segundo erdia atera dio, Donostiarrai sei, eta Chapelari hamazazpi.

Une honetan, Oriok segundo bakarra aterako lioke Tolosaldeari, baita txanda berean lehiatzen ari den aurkari zuzenari ere, Arraun Lagunak-i.

Lehen minutua bete denean, Oriok estropada burua hartu du. Arraun Lagunak-i segundo bat ateratzen dio, eta, hiru Donostiarrari eta Chapelari. Estropada bitan hausteko zorian da.

Nadeth Agirre Orioko patroiak eskua altxatu du. Itxuraz, estatxarekin arazoak izan ditu.

Bigarren txandan ariko diren lau ontziak prest dira:

1. Orio

2. Donostiarra

3. Donostia Arraun Lagunak

4. Chapela

Hondarribia ziabogan Tolosarengandik bi segundo atzetik zen arren, Garmendiaren kuadrillak ez du arraunketa galdu. Atzetik aurrerako lan ederraren ostean, berdeek Erostarbek gidatutako taldeari aurrea hartu diote azken txanpan.

Hondarribia nagusitu da lehen txandan

Hondarribiak irabazi du lehen txanda! Tolosadeari bi segundo atera dizkio. Buruz buruko lehian Iker Kortesek prestatutako taldea nagusitu da. Hirugarren lekuan Hibaika izan da, garaileengandik zazpira, eta Cabo, bederatzira.

1. Hondarribia 10.50,47

2. Tolosaldea 2,36ra

3. Hibaika 7,44ra

4. Cabo 9,18ra

Kontxako badiara sartu dira lau ontziak, eta indarrak garrantzi handiagoa izan du abileziak baino. GPS dantzan dabil. Herio bizian doaz arraunlariak.

Itzulerako luzean, poparerako bete-beteko itsasoa ez dagoen arren, olatuek nahikoa bultzatzen dituzte ontziak. Tolosaldea eta Hondarribia segundo berean dira. Bost segundora da Hibaika, eta zazpira Cabo.

Tolosaldea izan da ziabogara heldu den lehen taldea. Ramon Erostarberen taldeak 5,25eko denbora egin du. Hondarribiari bi segundo atera dizkio, hiru Hibaikari, eta ia lau Cabori.

Hondarribiak bigarren kaletik egin du lehen luzearen aurreneko zatia, olatuen errenpunpa saihesteko asmoz. Aquariuma atzean utzi ondoren, Miren Garmendia Ama Guadalupekoa ontziko patroiak trainerua berriz ere lehenengo kalera eraman du.

Hasi da Kontxako Banderako emakumezkoen lehen jardunaldia

Lehen txanparen ostean, lau traineruak segundo batean dira. Tolosaldea eta Cabo estropada eremuko erdialdera joan dira, itsaslasterrari zukua ateratzeko asmo. Hibaika, aldiz, ia bosgarren kalera gerturatu da.

Emakumezkoen lehen txandan lau ontzi hauek ariko dira:

1. Hondarribia. Seigarren postuan egin zuen osteguneko sailkatze estropadan. ETE ligako egungo txapelduna da.

2. Tolosaldea. Hirugarren lekuan geratu zen. Estreinakoz aritu da Euskotren ligan, eta jaitsierako kanporaketa jokatuko du.

3. Cabo. Bosgarren egin zuen. Galiziako ligan txapelduna izan da

4. Hibaika. Laugarren postuan egin zuen, eta ETE ligan bigarren lekuan geratu da.

Itsasoari dagokionez, olatuak hutsaren hurrengoak dira; haizeak, berriz, ipar, ipar-mendebaldetik ahul jotzen du. Halere, goizak aurrera egin ahala, zertxobat harrotuko dela iragarrita dago. Marea, berriz, 10:52an izan da goian, eta, beraz, gizonezkoen txandakoek itsaslaster gogorrago izango dute, nahiz eta marea hilak izan.

Ohitura legez, gaur goizean goiz egin dituzte traineruen pisaketak.

Ohitura legez, gaur goizean goiz egin dituzte traineruen pisaketak. Lehen irudian, gizonezkoen ontziak; bigarrenean, emakumezkoenak. @berria pic.twitter.com/dNUKfdliXl

— Mikel O. Iribar (@mikelorba) September 4, 2022

Sailkatze estropadetan, berriz, Hondarribia eta Arraun Lagunak izan ziren azkarrenak.

- Asteazkenean aise nagusitu zen Ama Guadalupekoa, eta Cabo kanpoan geratu zen 1,98 segundora. Urdaibaik ez zuen esperotako lana egin.

- Ostegunean, berriz, kinielek asmatu zuten. Donostia Arraun Lagunak izan zen lehena, eta txanponaren alderdi iluna Ondarroari egokitu zitzaion; zortzigarren amaitu zuen.

Polemikari itsatsita

Lehia hasi bitartean, errepaso bat asteari. BERRIAn, zalantzarik gabe, Aitor Manterola Garate kazetariak asteazkenean argitaratu zuen artikulua izan da irakurriena: traineruen nabigazioa bizkortzen duen pegatinaren erabilerari buruzkoa. Kontxan erabiltzea debekatu egin du antolakuntzak.

Informazio hori bertatik bertara eta zuzen zuzenean jaso du Mikel O. Iribar BERRIAko kazetariak, Donostiatik. Hark egingo du estropadaren zuzeneko jarraipena ere kaiatik.

Une batetik bestera emakumezkoen eta gizonezkoen kale zozketa egingo da @berria

— Mikel O. Iribar (@mikelorba) September 4, 2022

Gizonezkoetan ere egin dute zozketa:

- Lehen txandan: lehen kaletik Orio, bigarrenetik Getaria, hirugarrenetik Kaiku, eta laugarrenetik Hondarribia.

- Bigarren txandan: lehen kaletik Donostiarra, bigarrenetik Urdaibai, hirugarrenetik Ondarroa, eta laugarrenetik Zierbena.

Kaleak, zozketatuta

Jardunaldia hasi da jada Donostian, kale zozketarekin.

- Emakumezkoetan, lehen txandan: lehen kaletik Hondarribia, bigarrenetik Tolosaldea, hirugarrenetik Cabo, eta laugarrenetik Hibaika.

- Bigarrengoan: lehen kaletik Orio, bigarrenetik TDonostiarra, hirugarrenetik Arraun Lagunak, eta laugarrenetik Chapela.

Egun on! Iritsi da arraunaren asteburu handia, iritsi dira arraunaren Olinpiar Jokoak, iritsi da Kontxako Banderaren lehen jardunaldia.

- 11:00etan hasiko dira lehian emakumezkoak. Orio da bandera hirugarrenez irabazteko faboritoa, baina Arraunek konfiantza berreskuratu du. Bigarren txandan doaz biak. Atarikoa.

- 12:00etan iritsiko da gizonezkoen txanda. Zortzi traineru lehian. Bi txanda. Ohiko martingala: balizko eguraldi aldaketa, kale zozketa... baina estropada bizitzeko, hainbat modu. Atarikoa.

Biak zuzenean jarraituko ditu BERRIAk.