Irango presidenteak, Ebrahim Raisik, CNNko Christiane Amanpour kazetariarekin hitzartuta zuen elkarrizketa bat bertan behera utzi zuen atzo. Arrazoia, kazetariak beloa ez eramatea izan zen. Amanpourrek Twitterreko hari batean azaldu duenez, 40 minutu zeramatzan presidentearen zain, eta bere laguntzaileetako batek beloa eramateko eskatu zion. «Errespetu kontua» dela argudiatu zuen Raisik.
Ikusi gehiago: Mahsa Aminiren heriotzaren ondoko protestetan hildakoak 30 dira jadanik
Kazetariak azaldu zuenez, ordea, «modu onean» uko egin zion eskakizunari. «New Yorken gaude, non ez dagoen ez legerik ez ohiturarik buruan zapiak eramateari buruz», argudiatu zuen kazetariak. Amanpour Teheranen hazi zen, Irango hiriburuan, herrialde hartan kazetari lanetan ari den bitartean beloa erabiltzen duela nabarmendu zuen, hango ohiturak eta legeak betetze aldera. Baina, elkarrizketa Ameriketako Estatu Batuetan zenez, uko egin zion eskakizunari.
Amanpourrek gehitu zuen, gainera, asteak zeramatzatela elkarrizketa prestatzen, eta platoa antolatzen zortzi orduan aritu zirela.