Eusko Jaurlaritzako Segurtasun Sailak jakinarazi duenez, 60 urteko basoko langile bat hil zen atzo Aulestiko Urriola auzoan (Bizkaia), makina batek harrapatuta. Iturri horren arabera, zuhaitzak mozten ari zen behargina. Medikuak istripuaren gunera iristerako hilik zen langilea.
LAB sindikatuaren zenbaketaren arabera, aurten beharrean zela hil den 60.a da Euskal Herrian, basoan lanean hil direnetan hirugarrena. Idiazabalen (Gipuzkoa) hil zen lehenengoa, ekainean, eta Zeanurin (Bizkaia) bigarrengoa, abuztuan. Mobilizazioak antolatuko dituela jakinarazi du LABek.
Gainera, salatu du basoko lanetan jarduten diren enpresa gehienek ez dituztela betetzen «euren betebeharrak» segurtasunaren arloan: «Osalanek, Lan Ikuskaritzak eta Eusko Jaurlaritzak dute egoera aldatzeko giltza», amaitu du sindikatuak.