BBVA taldeak 4.842 milioi euroren onurak izan ditu aurtengo urtarriletik irailera, batez ere interes tasen igoerak bultzatuta. %46,2ko igoera da 2021eko lehen bederatzi hilabeteetako irabaziekin alderatuta; hau da, 2021eko epe berean baino 1.531 milioi euro gehiago irabazi ditu 2022an. Azken hiruhilekoan, uztailetik irailera, 1.844 milioi euro irabazi ditu banketxeak, 2021ean baino %31,4 gehiago.
Interes tasen igoerak eragin handia izan du irabazi handietan. Izan ere, interes marjinengatik 13.811 milioi euro irabazi ditu BBVAk, 2021ean baino %29 gehiago. Bankuaren arabera, "jardueraren dinamismoak" eta kredituaren igoerak (+%15) bultzatu du irabaziak handitzea, baina interes tasak igotzeak berebiziko garrantzia izan du; Euriborra, esaterako, %2,5en gainetik da orain.
Bestelako irabazietan, komisio garbiengatik 4.030 milioi euroren irabaziak izan dituzte (+%17,4). Interes marjinak eta komisio garbiak batuta, 17.842 milioi euro eskuratu ditu bankuak (+%28,8).
Hego Amerikan izan ditu emaitzarik onenak BBVAk. Argentina, Brasil, Bolivia, Uruguai, Kolonbia, Txile, Peru eta Venezuela kontuan hartuta, 614 milioi euro irabazi ditu banketxeak, ia bikoitza iazko datuekin alderatuta (+%98,3). Mexiko da oraindik ere BBVAren merkatu handiena, 2.964 milioi euro irabazi baititu Erdialdeko Amerikako herrialdean, joan den urtean baino %47,5 gehiago. Espainian %27,1 handitu ditu irabaziak, 1.514 milioi euro.
Irabazien erdiak baino gehiago (%53) Mexikon lortu dituzte, eta %27 Espainian. Turkian %6, Hego Amerikan %11, eta gainerako herrialdeetan %3: Txinan, Taiwanen, Japonian, Singapurren eta Europako Batasuneko beste herrialde batzuetan, esaterako.