Albistea entzun

Enpresak

Twitterrek bulegoak itxi ditu ehunka langilek dimisioa eman ondotik

Elon Muskek lan baldintzak zorroztu dizkie langileei, eta gogor mehatxatu ditu. Konpainiak prebentzioz itxi ditu bulegoak, langileek sare soziala sabotatuko duten beldur.

Twitter konpainiak San Franciscon (AEB) duen egoitzaren irudia.
Twitter konpainiak San Franciscon (AEB) duen egoitzaren irudia. GEORGE NIKITIN/EFE Tamaina handiagoan ikusi

Imanol Magro Eizmendi - Uxue Rey Gorraiz -

2022ko azaroak 18

Twitter ixteko zorian al da? Munduko sare sozial handienetakoak hondoa joko al du? Oraingoz badirudi ezetz, baina kinka larrian dago, eta astelehenera arte salbuespen egoeran egongo da. Izan ere, Elon Musk jabe berriak asteburu honetan bulegoak ixtea erabaki du, langileekin izaten ari den arazoen eraginez. Duela astebete lantaldearen erdia kaleratu zuen, eta, gelditzen zirenei lan baldintzak asko gogortuko zizkiela iradoki ondoren, askok dimisioa eman dute. Horiek horrela, ikusteke dago mantenuarekin edo zibersegurtasunarekin loturiko lan guztiak modu egokian egiten diren.

Bi aste baino ez dira igaro Muskek Twitter 41.000 milioi euroan erosi eta haren kontrola hartu zuenetik. Hartaz geroztik Teslaren fundatzailea ia egunero izan da albiste. Ordainpeko erabilera ezartzearen aukerarekin hasi zen, gero erabiltzaile batzuek hainbat enpresaren Twitter kontu ofizialak erostea lortu zuten, ondoren iritsi zen kaleratzeen zaparrada, eta azkenik gaurko ihesaldia.

Muskek aste hasieran jakinarazi zuen langileak estu hartzeko asmoz zebilela. «Oso gogor lan egiteko prest» egon zitezela esan zien, edo bestela lana utz zezatela. Joaten zirenei hiru hilabeteko soldata hitzeman zien kaleratzeen kalte ordain gisa, eta ehunka langilek onartu dute. Atzo hainbatek eman zuten bere irteeraren berri Twitterren, eta sare sozialetan beren curriculumak jarri zituzten lana bilatzeko. Gehienak prestakuntza bereziko langileak dira: ingeniariak, programatzaileak...

Dimisioa emanagatik ere, askok Twitterren barrunbeetara sartzeko modua zuten oraindik, eta hori eragozteko itxi ditu bulegoak Muskek. «Sabotajea jasateko» arriskua murriztu nahi izan du. Bulegoetako sarreraren itxiera ez da fisikoa bakarrik, langile ohien konpainia barneko profilak eta haien posta elektroniko helbideak ere itxi ditu.

Zibersegurtasunarekin kezka

Dimisio horiek egoera zaurgarrian utzi dute sare soziala. Adituen ustez, egun bi dira arazo gehien eman ditzaketen arloak. Batetik, zibersegurtasuna dago. Egun, edozein enpresa handik milaka zibereraso jasaten ditu egunero, eta Twitterren gisako sare sozial batek, are gehiago. Iragan asteko kaleratuen artean Lea Kissner zegoen, zibersegurtasun arloko arduradun nagusia.

Bestetik, Twitterren burmuina diren zerbitzarien mantenua dago. Haiek etengabeko berritze prozesu bat behar dute, eta zerbaitek kale eginez gero sare sozial osoa erortzeko arriskua dago. Lan horrek jende asko behar du egunerokoan.

#RIPTwitter

Twitter sarearen akaberari buruzko mezuz bete da. #RIPTwitter traola izan da zabalduena. Muskek, berriz, harengan ohikoa denez, txantxak egin ditu bere profilean. Hilerrira joan eta hilarri baten aurrean selfie-a ateratzen duen gizonaren memea jarri du, sare sozialak ikur duen txoriarekin. Horren aurretik mezu hau zabaldu zuen: «Eta... erabiltzaile kopuruaren langa igo dugu berriz, kar- kar-kar...».

Enpresaren itxiera fisiko eta birtualak egonkortasun pixka bat bermatu beharko luke asteburuan, baina ikusteke dago zein ekaitzek astintzen duen astelehenean. AEBetako webgune berezituetan nabarmendu dute Muski asko kostako zaiola galdu duen eskulan berezitu hori ordezkatzea. Bitartean, asko igo da Instagram eta Mastodon sare sozialen erabiltzaile kopurua.

Ikusi gehiago: Twitterretik at bada biderik

Twitter agurtzen hasiak

Twitterreko erabiltzaile askok harriduraz hartu dute albistea, eta jadanik sinetsiak dira sare sozialari laster ailegatuko zaiola iraungitze data. Hasiak dira agur esaten, txio bidez. Gainera, batzuek mezu bera baliatu dute Mastodon sare sozialera mugituko direla iragartzeko.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Gasteizko Eroski supermerkatuko irudi bat. ©Jaizki Fontaneda / FOKU

Inflazioak %5,8ra egin du gora urtarrilean

Iñaut Matauko Rada

Erregaiak garestitu izanak handitu du batez ere inflazioa, nahiz eta oinarrizko elikagaien prezioek behera egin duten, BEZaren jaitsieragatik.

Nissan eta Renaulten logoak, Bruselan, autoen erakuketa batean ©STEPHANIE  LECOCQ

Nissanek eta Renaultek euren arteko aliantza berritu dute

Maddi Iztueta Olano

Akordioan jasotakoaren arabera, aurrerantzean Nissanen kapitalaren %15 izango du Renaultek. Orain arte, horren %43 zuen.

LABen elkarretaratzea Donostian, lan ikuskaritzak salatutako tabernaren aurrean ©Gotzon Aranburu (Foku)

Ostalaritzako «lan esplotazioa» salatu du LABek

Berria

Sindikatuak elkarretaratze bat egingo du Donostian atxilotutako enpresaburuen jatetxe baten aurrean.

Robert Habeck Alemaniako Ekonomia ministroa, iragan astean. ©FILIP SINGER / EFE

Kinka buletina

Klima larrialdiari eta ingurumenari buruzko azken berriak zabaltzen dituen buletina.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.